Þó spá Dollýjar dulrænu fyrir árið 2011 hafi ræst víða þá rættist svo sem ekki allt – um sumt er ekki heldur útséð með, s.s. langa bréfinu sem Ingibjörg Sólrún og Geir Haarde munu skrifa saman og afhenda þjóðinni árið 2012.

Dollý vill lítið gera úr því sem ekki rættist enda hefur það verið þannig hjá henni að sumt af því sem hún hefur spáð fyrir hefur tekið nokkurn tíma að rætast, t.d. spáði hún að óeirðirnar í Bretlandi yrðu á árinu 2010 en ekki á árinu 2011 og eignar sér því fullan sigur þar.

Ekki urðu veigamiklar breytingar á ríkisstjórninni en það hefur ekki farið framhjá neinum sem fylgst hefur með að gustað hefur um einstaka ráðherra og sannarlega hefur Steingrímur þurft að vera í vörn vegna sinna fulltrúa þar. Hann hefur þó hvorki vikið né nokkur af hanns flokkshestum og gekk spá Dollýjar því ekki alveg upp.

Eins urðu ekki þær sviptingar í Framsóknarflokknum sem hún hafði spáð, en þær breytingar sem þar urðu snerust sannarlega um erfðaprinsinn sem ekki tók við keflinu heldur yfirgaf flokkinn og tók einhvern fjölda með sér.

Bókin sem Dollý segir Davíð vera að skrifa hefur ekki enn komið út en hann hefur svo sem ekki heldur setið þægur og hljóðlaus í Hádegismóum. Ekki var kveðinn upp dómur í máli Geirs Haarde og enn sitja þeir þingmenn sem drógu hann fyrir landsdóm sem fastast.

Það var kosið um Icesave samninginn en engar kosningar fóru fram um tillögur stjórnlagaráðs og hafði Dollý litla sem enga yfirsýn yfir það mál.

Evróvisíon varð hálfgert grín og kannski var það einmitt með sorg í hjarta sem við héldum heim úr þeirri keppni, minnug höfundar lagsins sem lést langt um aldur fram. Ekki vann Ítalía Evróvisíon og framlag þeirra til keppninnar þótti ekki rismikið.

Virðingin sem borgarstjórinn átti að njóta á árinu er ekki mjög sýnileg þó flestir geti verið sammála um að honum hefur farið nokkuð fram á árinu við stjórnsýslu sína og enn beitir hann heldur óhefðbundnum aðferðum.

Og enn spilar Spaugstofan sprell sitt, að ég held, en kannski er hún horfin þeim sem ekki hafa aðgang að Stöð tvö og kannski var það einmitt það sem Dollý átti við þegar hún spáði andláti þess þáttar.

Það verður ekki annað sagt en að spá Dollýjar dulrænu fyrir árið 2011 hafi gengið vel eftir. Henni fataðist reyndar flugið strax í fyrsta spádóm því fyrsta barn ársins var drengur en ekki stúlka eins og hún hafði spáð.

Hér á eftir verða dregnir fram nokkrir punktar sem sannarlega rættust hjá Dollýju í spánni fyrir árið 2011 en í nýrri færslu hér á eftir verður sett inn það sem ekki gekk eins vel eftir hjá vinkonu okkar.

… átakaár þar sem menn munu halda áfram að kjást um Icesave og eftirmála hrunsins. Forsetinn mun vísa nýjum Icesave sáttmála til þjóðarinnar en mér finnst eins og þjóðin sé búin að fá nóg af Icesave.

… ákærur verða gefnar út á hendur bankastjórunum og eigendum bankanna.

… Erjur innanhúss (á Alþingi) verða meiri og persónulegri en oft áður og utandyra standa menn sem sjá tækifæri til að fá skemmdarfýsn og ólátalöngun sinni fullnægt. [Sótt að Ástu Ragnheiði forseta Alþingis, eggjum kastað í alþingismenn]

… (þrasið á Alþingi) verður okkur ekki til hagsbóta svo mikið er víst. [Sagðar sögur af Mjallhvíti og dvergunum sjö]

… Við getum alltaf náð tökum á fjármálunum með samstilltu átaki en náttúran er óútreiknanleg og það munum við finna enn á ný á nýju ári.

… Það sem á okkur dynur mun hafa meiri áhrif á þá sem búa hér á höfuðborgarsvæðinu en áður hefur gerst. Það verða umbrot sem okkur órar ekki fyrir, en mér finnst þó að okkur muni líða eins og við höfum sloppið með skrekkinn að þessu sinni. [Talsvert öskufall á höfuðborgarsvæðinu en ekki gaus í Kötlu þrátt fyrir spár annarra þar um.]

…Katla er þarna, og hún hristir sig eitthvað, en mér finnst hún muni ekki láta vaða á næsta ári, nei ég er viss um það. [Ekkert gos í Kötlu]

… Í mars mun gera hér mikið áhlaup sem setur samgöngur úr skorðum um stundarsakir. [Úrkoma fjórðungi yfir meðallagi í mars. Sjá nánar hér.]

… Flóð halda áfram að hrekkja Evrópubúa og austur í henni Asíu munu verða hamfarir enn á ný sem skekja heimsbyggðina. [Flóð í Danmörku, Þýskalandi, Frakklandi, Ítalíu og víðar. Gríðarlegir jarðskjálftar í Japan og Nýja Sjálandi, flóð í Tailandi, Ástralíu og víðar. Sjá t.d. þennan tengil.]

… Í Bandaríkjunum mun rísa upp ný hreyfing sem síðar mun láta mikið að sér kveða á stjórnmálavettvangi. Þessi hreyfing mun berjast fyrir bættu og betra samfélagi og vill draga úr hernaðarbrölti þeirra. [Occupy Wall Street hreyfingin]

… Þeir (knattspyrnumennirnir ungu) munu þó ekki ná því takmarki sem þeir setja sér piltarnir en margir þeirra munu vekja gríðarlega athygli. [U21 í úrslitum EM í Danmörku]

… það verður ekki skráð nýtt nafn á stóru bikarana hér heima en mér sýnist að gömul stórveldi muni líta í lægra haldi fyrir þeim sem yngri eru. [KR vann tvöfallt í karlaflokki Stjarnan nýr meistari hjá konunum]

… Barcelona verður Spánarmeistari og vinnur Meistaradeild Evrópu, þá verður Messi kjörinn knattspyrnumaður ársins.

… Sjálfstæðisflokkurinn mun ekki leysast upp eins og líkur eru til nú um stundir. Þeir munu standa þetta af sér enda mun ættarklíkan þar á bæ ekki láta menn komast upp með neinn moðreyk. [Hanna Birna sótti að Bjarna Ben en hafði ekki erindi sem erfiði]

… Það verða stöðuveitingar víða um þjóðfélagið sem valda pirringi og svo virðist sem ráðamenn hafi ekki enn áttað sig á því að fólk vill miklu opnari og gegnsærri stjórnsýslu en áður. [Bankasýsla ríkisins]