Perlubygg með kjúklingi

by

Posted:

Er það ekki akkúrat núna, um áramót, sem hollustan ræður ríkjum? Það er þannig í mínu tilfelli og ekki bara það, ég reyni yfirleitt að standa við hollustueiðinn og helst árið um kring.

Í dag rétt skrapp ég heim eftir vinnu og náði þá að taka tvö úrbeinuð kjúklingalæri úr frystinum hjá mér. Þá fór ég í hugleiðslu og kom ég heim sársvöng rétt fyrir 20:30. Ég gaf mér því ekki langan tíma til að elda en lærin voru þiðin og tilbúin til eldunar. Það var því ekki um annað að ræða en gera eitthvað gáfulegt úr þeim.

Ég ákvað að sjóða kjúlingalærin og ætlaði að setja kjúklingatening í pott en komst þá að því að ég átti ekki kjúklingatenging þannig að grænmetisteningur varð að duga. Lærin fóru í pottinn en þá fyrst fór ég að spá í hvað ég ætti að hafa með þeim. Ég mundi þá eftir dásamlegu perlubyggi sem ég keypti á matarmarkaði í Hörpu í sumar og ákvað að sjóða mér lítinn skammt af þeim. Eitthvað varð ég að hafa með og það eina sem mér datt í hug var að brytja gulrót smátt og setti í pottinn með bygginu þegar þau höfðu soðið í um 10 mínútur, en þau þurfa 15 mínútna suðutíma.

Í restina tók ég kjúklinginn úr soðinu, brytjaði hann smátt, bætti útí byggið og færði yfir í skál. Eitthvað fannst mér þetta bragðlítið þannig að ég greip krydd úr hillunni, aromat (ég veit ekki það hollasta sem til er) og bragðbætti réttinn.

Ljómandi gott fannst mér – já ljómandi bara.

Perlubygg

Sætbakaðir lambaskankar (lambaleggir)

by

Posted:

Eins og þið vitið sjálfsagt þá var ég svo heppin að vinna 15 kg. af frábæru lambakjöti á FB í desember. Ég er vitaskuld óskaplega þakklát þeim á www.lambakjot.is fyrir að velja mig og ég lofaði að gefa þeim uppskriftir að lambakjöti sem ég elda og heppnast vel.

Í kvöld bauð ég uppá sætbakaða lambaskanka og ég verð að segja að þeir heppnuðust frábærlega vel. Ég byrjaði á því að leita eftir uppskriftum á netinu og fann m.a. tvær slíkar á lambakjot.is, ég las þær yfir og gerði síðan mína útgáfu sem fylgir hér með og er fyrir tvo.

Innihald
  • 2 lambaleggir
  • 1 laukur
  • 1 sellerístöngull
  • 1/2 sellerírót
  • 1 hvítlauksrif
  • 8 döðlur, steinlausar
  • 1 ds. tómatpúrré
  • 1 lambateningur
  • 1/2 vatn
  • salt
  • pipar
  • hveiti
  • olía til steikingar

Ég byrjaði á því að dusta smá hveiti á lambaleggina, þá brúnaði ég þá við háan hita í þykkbotna potti í smjöri og ólífuolíu, saltaði og pipraði. Þá tók ég leggina/skankana og lagði þá til hliðar. Lækkaði hitann á hellunni og saxaði allt grænmetið frekar gróft og steikti í pottinum. Bætti smá salti og pipar saman við og setti í einn lambatening. Þá opnaði ég eina litla dós af tómatpúrré og bætti við. Setti ca 1/2 lítra af vatni saman við og sauð í smástund.

Ég á tanginu frá Emile Henry og notaði hana í þetta sinn, en í raun má setja leggina í hvaða eldfasta mót sem er ef það er gott lok á því. Þegar ég var búin að smakka sósuna til með salti og pipar leyfði ég henni að sjóða smá stund og hellti henni síðan yfir leggina (sem voru tveir í mínu tilviki), bætti döðlunum saman við og setti í ofn sem var við ca 150-175 gráður. Þessu leyfði ég að malla í ca. 2 klst.

Emile Henry Tagine 35cm

Þetta bar ég fram í tangine-unni og gerði kartöflumús með. Dásamlegt!

Stuð á Suðurbandalaginu

by

Posted:

Við erum tilbúnar fyrir jólahlaðborðið á morgun – en þú?

Personalize funny videos and birthday eCards at JibJab!

Lambapottréttur með rótargrænmeti og perlubyggi

by

Posted:

Um daginn var ég svo heppin að fá einn lambaskrokk frá henni Hörpu frænku minni. Ég ákvað að úrbeina allt nema lærin og á talsvert af gómsætu lambakjöti í kistunni minni. Í dag kom loksins að því að ég ákvað að elda eitthvað og valdi poka sem innihélt gúllas eða stroganoff bita, ekki endilega bestu bitarnir í bænum en ljómandi góðir samt.

Ég fékk innblástur frá lækninum í eldhúsinu, einu sinni sem oftar, en hann hefur skrifað um lambapottrétt frá Lancasterskíri ef ég man rétt þar sem hann notar lauk og rótargrænmeti með lambinu. Mín útgáfa bar keim af því og svona gerði ég.

  • lambakjöt
  • laukur
  • gulrætur
  • sellerí
  • sæt kartafla
  • belgbaunir
  • smjör
  • salt
  • pipar
  • grænmetissoð (ég sauð saman tening og vatn)
  • perlubygg

Ég byrjaði á því að taka góða steypta pottinn minn frá Ikea og smurði hann að innan með smjöri. Þá sneiddi ég niður einn lauk og setti helming af honum í botninn á pottinum, þá skar ég niður kartöflur og gulrætur og lagði ofaná laukinn. Þar ofaná kom síðan lambakjötið, salt og pipar og loks setti ég aftur lauk, gulrætur, kartöflur, sellerí og nokkrar belgbaunir sem ég keypti í Kosti.

Þá hellti ég grænmetissoðinu ofaná, lokaði pottinum og setti í 200 gráðu heitan ofn í um klukkutíma. Þá tók ég pottinn út og setti perlubyggið út í soðið en það þarf 15 mínútur í suðutíma.

Og vá hvað þetta var gott – og hollt því ég notaði talsvert mikið meira af grænmeti en kjöti en kjötið er alls ekki slæmur kostur.

Ég er viss um að það væri hrikalega gott múv að setja sýrðan rjóma ofaná réttinn þegar hann er borinn fram en ég setti hann í súpuskál.

Verð ykkur að góðu 🙂

Ofnbakaður þorskur með blómkáli og blaðlauk

by

Posted:

Úff … ég er algjörlega forfallin fyrir eldunaraðferðinni sem Ragnar Freyr, læknirinn í eldhúsinu, kynnti fyrir mér í einu blogginu sínu. Það gengur út á það að krydda fisk, setja hann á álpappír í blússheitan hofn (með grilli) og steikja fiskinn í um 7 mínútur. Þessi aðferð er algjört gull og gerir fiskinn safaríkan og dásamlega góðan.

Áður en ég fór heim úr vinnunni í dag leitaði ég eftir uppskrift þar sem væri þorskur og blómkál og ég fann eina slíka (sjá hér). Ég ákvað að vera ekkert að prenta þetta út lagði það aðeins á minnið hvað væri í uppskriftinni enda vildi svo vel til að innihaldsefnin átti ég flest í ísskápnum hjá mér. Útkoman var frábær – algjörlega frábær en svona gerði ég þetta.

Innihald

  • þorskur
  • blómkál
  • blaðlaukur
  • rauð paprika
  • sinnep (ég átti sinnep úr Mosfellsbakaríi)
  • majones
  • sýrður rjómi með graslauk
  • ólífuolía
  • primadonna ostur
  • karrý
  • paprika
  • salt
  • pipar
  • cummin

Ég byrjaði á því að setja majones, sýrðan rjóma og sinnep í skál, bætti við kryddi (öllu nema cummin) út í og hrærði vel. Smakkaði þetta aðeins til þar til ég var sátt við bragðið.

Þá smurði ég eldfast mót með ólífuolíu, brytjaði blómkálið, laukinn og paprikuna niður og setti í mótið og hellti sósunni yfir. Þetta setti ég í 175 gráðu heitan ofn og bakaði í um 30 mínútur.

Á meðan klæddi ég grunna ofnskúffu með álpappír, lagði þorskbitana þar á og kryddaði með cummin, papriku og pipar. Þarna var grænmetið orðið vel bakað svo ég tók það úr ofninum, blússhitaði hann 275 gráður og grill og skellti skúffunni í miðjan ofninn. Þar fékk fiskurinn að malla í um 7 mínútur. Þá tók ég hann út og lagði ofaná grænmetið og sósuna í eldfasta mótinu og bar fram. Þetta var algjörlega frábær matur 🙂

Fiskur með blómkáli og blaðlauk
Fiskur með blómkáli og blaðlauk

Ofnbakaður fiskur með hrísgrjónum

by

Posted:

Það var skellt í tilraunaeldhús í Efstahjalla í kvöld. Ég átti þorskbita í frystinum sem ég afþýddi og velti því síðan fyrir mér hvað ég ætti að gera við fiskinn. Úr varð að ég gerði ofnbakaðan fisk með hrísgrjónum og verð að segja að mér tókst óvenju vel upp!

Hráefni

  • Fiskur (ég notaði þorsk)
  • laukur
  • paprika
  • tómatar
  • hrísgrjón
  • smjör
  • garam masala
  • hvítlauksduft
  • paprikuduft
  • salt
  • pipar

Ég byrjaði á því að skera niður lauk og papriku og lét það malla í óskaplega góðum potti sem ég keypti í Ikea og þolir allt (er ekki ósvipaður og LeCruset pottur, nema kostar hvorki fót né handlegg). Þá setti skar ég tómatinn niður og setti með grænmetinu. Kryddið fór síðan út í pottinn og þessu öllu hrært vel saman. Hálft glas af vatni fór þvínæst í pottinn ásamt hrísgrjónum og þessu blandað vel saman. Þá lagði ég fiskinn ofaná, setti lok á pottinn og setti í 180 gráðu heitan ofn í ca. 15 mínútur eða nægan tíma til að hrísgrjónin myndu sjóða og fiskurinn bakast.

Það eru engar mælieiningar í þessum rétti frekar en öðrum en maður þarf aðeins að fá tilfinningu fyrir því hversu mikið vatn hrísgrjónin þurfa, það lærist með tímanum.

Verði þér að góðu!

Girnilegur ofnbakaður þorskur

by

Posted:

Ég held að það sé löngu kominn tími á nýja uppskrift úr tilraunaeldhúsi Ingibjargar.

Fyrir nokkru sá ég uppskrift frá Lækninum í eldhúsinu þar sem hann skipti kjúlingi út fyrir þorsk bita. Þetta er hrikalega góður réttur og í kvöld ákvað ég að fikra mig aðeins út frá honum en nýtti mér innblástur úr uppskrift Ragnars Freys.

10391026_10204321096683099_8599743992413001375_n

Girnilegur ofnbakaður þorskur

  • Þorskbitar (hnakkastykki eru best)
  • Salt
  • Pipar
  • Paprikuduft
  • Garam Masala

Þorskurinn er kryddaður með þessum kryddum og látinn standa í ísskáp (eða á borði) á meðan sósan er undirbúin.

  • Púrrulaukur
  • Gulrætur
  • Kartöflur
  • Sellerí
  • Kókosmjólk
  • Matreiðslurjómi
  • Túrmerik
  • Pipar
  • Smjör/ólífuolía

Grænmetið er skorið dálítið smátt, olían (smjörið) hitað á pönnu og grænmetið sett útá. Þá er kryddið sett á pönnuna og að lokum er kókosolíunni hellt yfir. Ég setti að auki örlítið af matreiðslurjóma sem ég átti í ísskápnum saman við og lét sjóða í ca. 10 mínútur.

Þegar allt var farið að sulla á pönnunni tók ég fiskinn, setti hann á ofnskúffu sem ég hafði klætt með álpappír og bakaði á hæsta hita og grilli í um 8-10 mínútur í miðjum ofni.

Tók sósuna og færði uppá djúpan disk og lagði fiskinn ofaná. Ég er viss um að það væri líka gott að hafa annað hvort kúskús eða hrísgrjón neðst á diskinum.

Verði ykkur að góðu.

Erindi um knattspyrnu kvenna

by

Posted:

Blikar1979Komið þið sæl,

Þegar Geir hringdi í mig og bað mig um að ræða við ykkur um framgang knattspyrnu kvenna í Breiðabliki var það mér mikill heiður og sómi að þekkjast boðið. Það hefur enda var það mitt aðal áhugamál í rúm 30 ár að fylgjast með fótboltastelpunum okkar, dæma, skipta mér af og rífa dálítið kjaft í leiðinni. En fótbolta hef ég lítið sem ekkert æft – svo það sé nú alveg á hreinu! Þó ég sé komin yfir miðjan aldur þá hef ég ekki fylgt Blikastelpunum allt frá byrjun, þar þarf að ræða við mér eldri konur, s.s. Rósu Valdimarsdóttur dóttur Valda vallarvarðar eða Arndísi Sigurgeirsdóttur í Iðu bókabúð svo einhverjar séu nefndar.

Continue Erindi um knattspyrnu kvenna

Að afloknum kosningum

by

Posted:

Sveitarstjórnarkosningar fyrir kjörtímabilið 2014-2018 fóru fram í gær. Eins og gefur að skilja voru úrslitin á alla vegu, sumir voru ánægðir, aðrir ekki og allir hafa skoðun á niðurstöðunum. Sjálf hefði ég viljað sjá betri niðurstöðu, sérstaklega í Kópavogi. Mitt fólk í Samflylkingunni tapaði manni og meirihlutaflokkarnir, Framsókn og Sjálfstæðisflokkur
héldu velli og Kópavogslistinn rann inní íhaldið.

Aðal niðurstaða kosninganna er þó sú staðreynd að aldrei áður hafa jafn fáir nýtt atkvæðisrétt sinn. Það er áhyggjuefni í sjálfu sér en ástæðan er þó fyrirliggjandi.

Áherslur flokkanna eru alltof líkar. Ef einn boðaði aukin útgjöld í íþróttastyrki, gerðu hinir flokkarnir það líka. Ef einhver vildi bæta þjónustu við aldraða sögðu hinir flokkarnir að þeir vildu líka gera það. Í raun var sama og ekkert sem skildi að þau 8 framboð sem komu fram í Kópavogi, nema fólkið.

Ungt fólk, sem er vant því að geta gert alla skapaða hluti í gegnum tölvu, nennti ekki að mæta á kjörstað. Þeim finnst það tímasóun. Enda hefur margt af ungu fólki ekki áhuga á að kynna sér stefnumál flokkanna, hvað þá meira. Niðurstaðan er sú að unga fólkið vill láta hugsa fyrir sig, að gera það sjálfur er of mikil áreynsla.

Þeir eldri, sem eru á kafi í stjórnmálunum, verða að fara að hugsa út fyrir boxið. Ná til grasrótarinnar og komast út úr þeirri sápukúlu sem menn eru í. Fyrst og síðast þurfa menn þó að fara að tala mannamál, tala þannig að menn skilji hvað um er rætt og hætti þessu endalausa blaðri um ekki neitt. Stjórnmálamenn eiga það nefnilega til að telja sig vera í Frúnni í Hamborg, þar sem ekki má segja já, nei, svart eða hvítt. Menn verða að fara að girða sig í brók og taka afstöðu. Það gerði frúin í Framsóknarflokknum og uppskar tvo
borgarfulltrúa þrátt fyrir að hávær minnihluti gerði allt sem hægt var til að sverta hana og mannorð hennar og skoðanir. Þær trakteringar duga ekki lengur.

Stjórnmálamenn þurfa að koma sér uppúr hjólförunum!

Af hverju á ég að kjósa á laugardag?

by

Posted:

xs-samfylkingin-300x300Það vita það allir að ég er mikill jafnaðarmaður og hef verið lengi. Stundum hef ég reynt að hafa áhrif á vini mína og fjölskyldu og reynt að sannfæra þau um að mín skoðun í stjórnmálum sé sú sem er skynsamlegust. Ég fór í framboð, var varabæjarfulltrúi í 4 ár, og hef sinnt ýmsum samfélagslegum verkefnum fyrir Samfylkinguna (áður Alþýðuflokkinn) á mínum 50 árum.

Það eru margir sem hafa mikla og djúpa sannfæringu fyrir stjórnmálum, en því miður virðist þeim þó fara fækkandi. Persónulega er ég ekki hissa á því. Stjórnmál hafa á síðustu árum þróast út í það að vera einn risastór skítapollur þar sem allt er leyfilegt. Menn komast upp með að ljúga, segja eitt í dag og annað á morgun, hafa þá skoðun sem er vinsælust á hverjum tíma og villa um fyrir kjósendum, ekki aðeins fyrir kosningar heldur alltaf! Já alltaf!

Continue Af hverju á ég að kjósa á laugardag?