Vel sterk austurlensk kjúklinganúðlusúpa

by

Posted:

Einn af mínum uppáhalds veitingastöðum er Noodle Station sem var á Skólavörðustíg en er núna kominn á Laugaveg auk þess að vera í Hafnarfirði. Þar fæ ég mér jafnan kjúklingasúpuna þeirra og er alltaf pínulítið sorgmædd þegar ég er búin úr skálinni, þetta er svo gott!

Í margar vikur hef ég hugsað um að útbúa mína eigin kjúklinganúðlusúpu og í kvöld lét ég loksins verða af þessu. Útkoman var í einu orði sagt frábær og ég er ákaflega hamingjusöm eftir kvöldverðinn jafnvel þó að ég hafi ekki komist með tærnar þar sem Noodle Station hefur hælana.

Hér er það sem ég gerði:

  • kjúklingalæri
  • gulrót
  • engifer
  • rautt chilli
  • hvítlaukur
  • sítrónublöð (jurt sem vex í glugganum hjá mér)
  • vorlaukur
  • sykur (gott að nota hrásykur, kókospálmasykur eða púðursykur)
  • kjúklingateningur
  • vatn
  • smá soyjasósa eða tamarinsósa
  • hrísgrjónanúðlur

Ég byrjaði á því að setja tvo kjúklingateninga frá Knorr í pott og einn líter af vatni og lét sjóða. Á meðan reif ég niður eina stóra gulrót og ca. 4 cm. af dálítið þykkri engiferrót. Því bætt ég út í pottinn. Þá saxaði ég niður einn meðalstóran rauðan chilli með fræjum, tvö hvítlauksrif og bætti í pottinn. Suðan hamaðist í pottinum og ég bætti 4 úrbeinuðum kjúklingalærum í pottinn. Þetta lét ég malla í ca. 20 mínútur en bætti þá smá sykri útí pottinn (það má auðvitað sleppa þessu), setti vorlauk, sítrónugrasið og dass af tamarinsósu.

Þegar þarna var komið var lyktin úr pottinum orðin svo dásamleg að ég átti beinlínis erfitt með mig en ég leyfði þessu engu að síður að sjóða meðan ég skellti líter af vatni í annan pott, lét suðuna koma upp og setti hrísgrjónanúðlur í. Þær sauð ég í 7 mínútur, hellti vatninu af og skolaði núðlurnar vel í köldu vatni og lét renna af þeim.

Þegar þarna var komið mátti ég loks setja smávegis af núðlum í skál og svo hellti ég súpu yfir með kjúkling og ég skal segja ykkur það … þetta er dásamlegt 🙂

kjúklinganúðlusúpa

Fiskisúpa sem kengur er í

by

Posted:

Loksins fann ég uppá því að skella í tilraunaeldhús. Að þessu sinni átti ég bita af ljómandi fínum þorskhnakka, skrapp í búðina og keypti nokkra hluti sem mér finnst ómissandi að eiga í ísskápnum, lauk, gulrætur og sellerí. Þessir þrír hlutir eru ljómandi góður grunnur í allskonar súpur og pottrétti og ég ákvað að skella í fiskisúpu sem kengur væri í.

Innihald

  • þorskur (eða annar góður fiskur)
  • gulrætur
  • sellerí
  • laukur
  • paprika
  • engifer
  • sæt kartafla
  • tómatsósa úr dós (eða niðursoðnir tómatar)
  • grænmetiskraftur
  • vatn
  • pipar
  • ólífuolía

Ég byrjaði á því að skera niður lauk, sellerí og gulrætur í mátulegar sneiðar. Þetta setti ég í þykkbotna pott ásamt ólífuolíu og leyfði því að malla á meðan ég skar niður restina af grænmetinu. Þegar þetta var allt komið í pottinn leyfði ég því að taka sig aðeins áður en ég setti dós af tómatsósu (eða niðursoðnum tómötum) í pottinn, ásamt vatni og hleypti suðu á pottinn. Þá bætti ég grænmetiskrafti við og pipraði hressilega. Þetta fékk að sjóða í um 10 mínútur til viðbótar áður en ég sneiddi þorskinn niður í um 1 cm þykkar sneiðar og lagði í pottinn sem ég var nú búin að slökkva undir. Þar fékk hann að dóla sér í 2-3 mínútur áður en ég borðaði súpuna af bestu lyst og hugsaði með mér að nú hefði verið gott að eiga sýrðan rjóma í ísskápnum!

 

Bleikju sashimi

by

Posted:

bleikjusashimiSíðustu ár hafa bragðlaukarnir mínir farið að kunna að meta sushi og sashimi. Fyrst og síðast ber að þakka það Hinna frænda mínum, stórkokki og snillingi. Hann var duglegur að búa til sushi handa mér sem var 100% án skelfisks og þegar ég komst uppá bragðið varð ég óstöðvandi. En seinna meir hefur sashimi komið sterkar inn hjá mér. Sashimi er í raun hrár fiskur sem er búið að blanda með kryddjurtum og sósu og er alveg dásamlega góður ef hann er rétt gerður.

Í dag ákvað ég að reyna þetta sjálf og mér fannst mér takast afbragðs vel til og þegar svo ber undir þá deili ég uppskrift með ykkur. Eins og venjulega eru engar mælieiningar, maður þarf bara að hafa tilfinningu fyrir þessu.

Bleikju sashimi

  • fersk bleikja
  • vorlaukur
  • steinselja
  • engifer
  • sesam olía
  • sesam fræ
  • lime

Ég byrjaði á því að roðrífa bleikjuflökin og skar síðan fiskinn í þunnar sneiðar ca 1×0,5 cm. Þá klippti ég niður vorlauk í skál setti síðan fiskinn saman við og hrærði þessu saman með skeið. Þá hellti ég sesam olíu yfir, ekki of mikið betra að bæta við smátt og smátt. Loks reif ég niður (eða saxaði) ferskt engifer og steinselju og bætti við og í lokin fór vænn slurkur af sesam fræjum.

Með þessu er borið fram ferskt lime sem hver og einn ræður hversu mikið er sett út á fiskinn.

Hrákaka a la Ingibjörg

by

Posted:

Hrákaka a la Ingibjörg
Hrákaka a la Ingibjörg

Í kvöld skellti ég í hráköku og notaði aðeins það sem ég átti þegar í eldhúsinu. Þetta varð því tilraunahrákaka og þér að segja þá er hún bara ljómandi góð.

Innihaldið er:

  • banana
  • döðlur
  • möndlur
  • kókosolíu
  • saxaðar möndlur
  • kókoshveiti
  • rúsínur
  • lífrænt súkkulaði
  • suðusúkkulaði

Ég tók banana, döðlur, möndlur og kókosolíu og hrærði saman í blandara … það gekk reyndar ekki sérlega vel en tókst þó að lokum. “Deigið” var full þunnt þannig að ég hrærði kókoshveiti og söxuðum möndlum saman við til að þykkja þetta. Þegar mér fannst áferðin vera orðin góð setti ég þetta í form sem ég hafði sett eldhúspappír ofaní og kældi.

Þá var komið að súkkulaðinu, ég átti eina plötu af lífrænu súkkulaði í skúffunni minni, setti það í skál ásamt smávegis af kókosolíu en þar sem mér fannst ekki nóg af súkkulaði bætti ég við örlitlu af suðusúkkulaði sem ég átti. Þetta bræddi ég saman í örbylgjuofninum en auðvitað á maður að gera það í vatnsbaði.

Þá setti ég rúsínurnar ofaná deigið, hellti súkkulaðinu þar ofaná og frysti.

Það væri ekki galið að gera rákir í súkkulaðið og deigið áður en það er fryst þar sem súkkulaðið vill brotna þegar það er skorið beint úr frystinum.

Ljómandi gott og girnilegt 🙂

Kjúklingur í rauðu karrý

by

Posted:

Ja hérna hér – er hægt að toppa sjálfa sig aftur og aftur?

– Já, ef þú ert óhrædd við að prufa þig áfram og láta reyna á innsæið í eldamennskunni 🙂

Já ég toppaði sjálfa mig í kvöld þegar ég skellti í tilraunaeldhús og gerði mér rétt sem ég kalla Kjúkling í rauðu karrý.

Innihald:
  • kjúklingalæri
  • laukur
  • paprika
  • tómatar
  • grænar baunir (frosnar)
  • rautt karrý mauk
  • kókosmjólk
  • garam masasla
  • túrmerik
  • pipar
  • smjör
  • ólífuolía

Ég byrjaði á því að hita smjör og ólífuolíu á pönnu, sneiddi laukinn smátt og setti á pönnuna, þá skar ég niður papriku og tómata og þetta fór á pönnuna með lauknum. Pannan var aðeins yfir miðlungshita. Ég setti kryddið saman við, byrjaði á túrmeriki svo garam masala og náði aðeins út bragðinu á þeim á pönnunni. Þá fór piparinn á pönnuna og loks karrýmaukið þar sem það blandaðist vel við grænmetið.

Ég skar niður kjúklingalæri, í munnstóra bita, og bætti á pönnuna, hækkaði hitann þá tímabundið til að kjúklingurinn tæki aðeins lit. Lækkaði svo hitann aftur áður en ég setti kókosmjólkina og grænu baunirnar útí og leyfði þessu að malla í góða stund, ca. 10 mínútur, eða þar til kjúklingurinn er steiktur í gegn og allt hefur blandast vel á pönnunni.

Hrísgrjónin

Í hrísgrjónin notaði ég:

  • hrísgrjón (ég notaði hýðishrísgrjón, sem eru aðeins hollari en hin)
  • vatn (helmingi meira en af hrísgrjónum)
  • ólífuolía
  • saffran þræði, nokkra
  • piparkorn
  • fennelfræ
  • lárviðarlauf
  • grænar baunir (frosnar)

Ég sýð hrísgrjón þannig að ég set tæplega helmingi meira af vatni en hrísgrjónum, smávegis af ólífuolíu, kryddið fer í pottinn með hrísgrjónunum og lok á pottinn.

Þegar suðan er komin upp, lækka ég hitann í lægsta og leyfi þessu að standa þar til hrísgrjónin hafa tekið í sig allt vatnið. Þá bætti ég baununum saman við, hrærði aðeins í, setti lokið á pottinn og leyfði baununum að þiðna í rólegheitum.

Þetta bar ég fram með grískri jógúrt – og er líklega einn besti karrýkjúklingur sem ég hef smakkað!

Karrýkjúklingur

Langeldað úrbeinað lambalæri

by

Posted:

Eins og flestum er kunnugt þá var ég svo heppin að vinna 15 kg. af úrvals lambakjöti frá www.lambakjot.is núna um jólin. Ég hef fengið fólk í mat og boðið uppá þessa dásemd og mér finnst ég toppa mig í hvert sinn. Í kvöld kom pabbi í mat til mín ásamt Erlu frænku, Kristleifi menni hennar og Gunni Stellu dóttur þeirra. Þetta var ansi huggulegt matarboð og var gerður virkilega góður rómur að lærinu sem ég bauð uppá.

Eins og venjulega þá las ég mér til um nokkrar aðferðir við að hægelda lærið og endaði síðan á minni eigin aðferð.

Innihald:

  • lambalæri
  • gulrætur
  • sæt kartafla
  • bökunarkartafla
  • laukur
  • rauðlaukur
  • hvítlaukur
  • ólífuolía
  • nautakraftur
  • salt
  • pipar

Ég byrjaði á því að úrbeina lærið, las aðeins til um það hjá lækninum í eldhúsinu og tókst bara vel til. Þá skar ég niður grænmetið, allt nema sellerírótina og setti í botninn á þykkbotna potti. Þá tók ég kjötið og setti ofaná, saltaði og pipraði og setti í ofninn sem ég hafði stillt á 70 gráður ca. Þar fékk kjötið að dóla sér í tæpan sólarhring.

Ég tók beinin úr lærinu, setti í pott og sauð ásamt kjötkrafti og bætti síðan um 2 bollum af soði í pottinn með kjötinu en geymdi afganginn til að nota í sósuna.

Ca. klukkustund áður en gestirnir komu, hækkaði ég hitann á ofninum í 120 gráður. Eftir 45 mínútur tók ég kjötið úr pottinum, setti á ofnskúffu og undir grillið í ofninum þar til það hafði “poppast” aðeins og myndast skorpa. Þá leyfði ég kjötinu að hvílast í ofninum.

Þetta bar ég fram með sellerírótarmauki, sósu, salati og baunum.

úrbeinað lambalæri, hægeldað

Kjúlli í hvítvíni

by

Posted:

Ja hérna hér – ég sem hélt að það væri ekki hægt að toppa bragðgæðin og einfaldleikann, en jú – vinur minn, Bjarni Viðar Sigurðsson keramiker, sýndi mér fram á annað!

Ég átti von á góðum gestum í mat í kvöld og hafði tekið kjúklingabringur úr frystinum í morgun. En ég átti stutt stefnumót við Bjarna og spurði hann ráða varðandi eldun á kjúllanum. Það stóð ekki á svörum frá listamanninum.

Innihald:

  • 3 kjúklingabringur
  • 2-3 laukur
  • 1-1 1/2 box af sveppum
  • 2-3 bollar af hvítvíni
  • 1-2 pelar af rjóma
  • kjúklingakraftur
  • nautakraftur
  • 1-2 tsk af sykri
  • salt
  • pipar
  • smjör eða olía

Aðferð:

Kryddaðu kjúklingabringurnar með salti og pipar og steiktu þær létt í olíu eða smjöri á pönnu. Taktu þær síðan af og settu til hliðar. Skerðu niður laukinn, frekar smátt, og sveppina í sneiðar. Steiktu laukinn og síðar sveppina í smjöri/olíu á sömu pönnu og bringurnar. helltu hvítvíninu útá pönnuna og láttu sjóða ögn niður, settu síðan rjómann saman við og leyfðu suðunni að koma upp. Helltu í eldfast mót og bættu sykrinum saman við. – þeir sem það vilja geta sett rósmarín saman við (ég vil það alls ekki)

Skerðu kjúklingabringurnar (sem eru hráar í miðjunni) í sneiðar, ekki of þunnar og ekki of þykkar og settu út í sósuna í eldfasta mótinu. Settu lok á mótið og bakaðu í ofni við 175-200 °C í um 30 mínútur.

Gott að bera fram með salati, parmessanosti, hrísgrjónum og hvítlauksbrauði.

30 daga Bio Effect húðmeðferð einfaldlega virkar

by

Posted:

Ég var svo heppin að fá 30 daga Bio Effect vörur í afmælisgjöf í desember. Þar sem ég var nú bara að verða 51 árs þá skildi ég ekki alveg hvað var verið að gefa mér svona fínar snyrtivörur en þegar mér var bent á að þessi kíló sem ég hef tapað af sjálfri mér síðustu 18 mánuði hafi skilið eftir slappa húð hér og þar, m.a. í andlitinu, þá tók ég gleði mína á ný.

Það var nú líka þannig að ég hafði tekið eftir talsvert drjúgum baugum undir augum og því að broshrukkurnar voru heldur fleiri og dýpri en ég átti að venjast. Ég tókst því á við áskorunina um 30 daga notkun á þessu undraefni og sá sannarlega ekki eftir því. Ég bar 3-4 dropa tvisvar sinnum á dag á andlitið á mér, líka í kringum augun, og viti menn. Þetta virkar!

Ég er ekki mikið fyrir snyrtivörur svona almennt og hef ekki notað mikið af þeim í gegnum tíðina. Þess vegna átti ég ekki von á miklum árangri, en ég verð sannarlega að endurskoða þá afstöðu því 30 daga Bio Effect húðmeðferðin virkar. Það er einfaldlega þannig. BioEffect30

Tómatsúpa Ingibjargar

by

Posted:

Ég gerði mér tómatsúpu í kvöld. Að þessu sinni hafði ég enga fyrirmynd, aðeins það sem ég átti í ísskápnum og öðrum skápum íbúðarinnar. Útkoman var frábær og matarmikil súpa.

Innihald:

  • skalottulaukur
  • sellerístöngull
  • kartöflur
  • tómatur
  • brokkolí
  • tómatpúrré
  • grænmetisteningur
  • ólífuolía
  • vatn

Ég brytjaði grænmetið smátt og steikti í ólífuolíunni í þykkbotna potti. Þá bætti ég tómatpúrré úr lítilli dós útí og svo þynnti með vatni. Hafði súpuna samt þannig að hún yrði vel þykk þegar ég myndi mauka hana.

Þegar grænmetið var mátulega soðið (ca. 10 mínútur) þá maukaði ég með töfrasprota og málið dautt. Frábærlega góð súpa þó ég segi sjálf frá og hefði örugglega toppað sig ef ég hefði átt sýrðan rjóma og smá kóríander.

Hrákaka frá himnaríki

by

Posted:

Í dag lagði ég í hrákökusmíð.  Ekki á hverjum degi sem ég geri það en í dag var greinilega rétti dagurinn enda hundleiðinlegt veður úti og ekkert skemmtilegra að gera en þetta.

Ég byrjaði á því að gera botninn en í hann fór eftirfarandi hráefni:

  • möndlur
  • döðlur
  • vanilla

Þessu mixaði ég saman í matvinnsluvél þar til ég var komin með þokkalegan graut. Þá flatti ég þessu út í bökunarform sem ég hafði klætt með plastfilmu og stakk inní ísskáp.

Þá gerði ég súkkulaðikrem en í það notaði ég:

  • lífrænt 70% súkkulaði með expressóbragði
  • kókosolíu

Þetta bræddi ég saman í örbylgjuofninum og leyfði að kólna aðeins áður en ég tók botninn út og hellti súkkulaðinu yfir. Þá fór kakan aftur í ísskápinn.

Á meðan kakan harðnaði var ég að vafra um á vefnum og sá uppskrift að einskonar frauðkremi sem innihélt kasjúhnetur, frosin jarðarber og eitthvað eitt í viðbót sem ég man ekki hvað er. Hvað um það, ég átti jarðarber í frystinum, möndlumjólk í ísskápnum og banana. Mér datt því í hug hvort ég gæti ekki búið til frauð úr þessu.

Það var því haldið aftur í eldhúsið. Ég mixaði saman 1 banana, slatta af frosnum jarðarberjum og u.þ.b. einn bolla af möndlumjólk. Þetta varð ekki eins þykkt og ég hefði viljað þannig að ég læddist í skápinn minn, sótti þar 1 blað af matarlími, mýkti það í vatni og leysti síðan upp í örlitlu volgu vatni.

Þessu blandað ég saman við bananann og jarðarberin, hellti í skál og setti í ísskáp til að setjast. Ég ætla svo að brjóta kökuna ofaní formin og borða með skeið.

Ég hugsa samt að þegar ég geri þessa köku aftur (því það mun ég gera þá ætla ég að byrja á kreminu, setja það í fallegt form, gera botninn og hvolfa stífu kreminu ofaná hana þegar hún er tilbúin.

Eins og nærri má geta þá fylgir þessu engin mynd, enda uppskriftin aðeins á hugmyndastigi en það sem ég hef smakkað af henni er dásamlegt, já himneskt alveg hreint 🙂