Ýsa í ofni

by

Posted:

Í kvöld eldaði ég ýsu í ofni. Frumsamin uppskrift auðvitað, aðferðarfræðin byggir á hæfilegri leti en ekkert var til sparað.

Innihaldið var eftirfarandi (dugar fyrir 2):

  • 400 gr. ýsuflök, roð- og beinlaus
  • 4-6 kartöflur (afhýddar og skornar í teninga)
  • 1 sneið af sætri kartöflu (ca. 1,5 cm) skorin í teninga
  • 1 stilkur af sellerí, sneitt niður
  • 1/2 til 1 laukur (eftir smekk) þunnt sneiddur
  • salt
  • karrý
  • saffran
  • ostur (rifinn)
  • sítrónuolía
  • Ólífuolía

Ég fann mér eldfast mót og smurði það með ólífuolíu. Þá raðaði ég kartöflum í botnin, setti laukinn þar ofaná, síðan laukinn, selleríið og sætu kartöfluteningana.Stráði karrý, salti og saffran yfir og síðan smá slettu af sítrónuolíu.

Þetta bakaði ég í 180 gráðu heitum ofni í ca. 20 mínútur tók það þá út, setti fiskin ofaná og bakaði í ca. 15 mínútur til viðbótar. Þegar fiskurinn er orðinn soðinn í gegn (og kartöflurnar) tók ég þetta út aftur, stráði osti ofaná og bakaði í 5-10 mínútur til viðbótar (skaut þá hitanum á ofninum mínum upp í 220 gráður).

Mjög fínt, sérstakt bragð sem saffranið skilur eftir.

Ég myndi gefa þessum rétti 8 af 10 mögulegum en líklega verður hann betri ef maður sýður aðeins uppá kartöflunum í söltu vatni (ca. 8 mínútur) og steikir laukinn á pönnu (þannig að hann verði glær) þá má setja fiskinn beint í formið með hinu og baka í enn styttri tíma.

Hrökkbrauðið hrjúfa

by

Posted:

Samstarfskona mín, Berglind Eva Ólafsdóttir, sendi mér þessa uppskrift og svo fékk ég það staðfest frá Sigríði Ingu Sturludóttur, sem einnig vinnur með mér að þetta væri hið besta brauð.

  • 1 dl sólblómafræ
  • 1 dl graskersfræ
  • 1 dl hörfræ
  • 1 dl sesamfræ
  • 1 dl gróft haframjöl
  • 3½ dl spelthveiti
  • 1¼ dl olía
  • 2 dl vatn
  • 2 tsk. salt

Blandið öllu saman í skál og hrærið þar til deigið er vel blandað (linur massi). Setjið bökunarpappír á bökunarplötu og helminginn af deiginu á pappírinn, setjið bökunarpappír yfir deigið og fletjið út með kökukeflinu. Helmingurinn af deiginu passar á u.þ.b. eina bökunarplötu. Gerið það sama við hinn helminginn af deiginu. Skerið deigið í þá stærð sem þið viljið hafa kökurnar í áður en bakað er.

Bakist í 10-15 mín við 200 gráður eða þar til hrökkbrauðið er stökkt. Geymið hrökkbrauðið í loftþéttu boxi til að það verði ekki seigt. Það er gott að bæta kúmeni í fræblönduna.

Besta franska lauksúpa allra tíma

by

Posted:

Frönsk lauksúpa er einn af mínum uppáhaldsréttum. Ég hreinlega elska þykka, bragðmikla lauksúpu sem ást og alúð hefur verið lögð í. Stundum reyni ég að búa til slíka lauksúpu og legg þá í hana bæði mikinn tíma og mikla ást. Uppskriftin sem ég notast við kemur úr franskri matreiðslubók sem ég eignaðist fyrir mörgum árum, já svo mörgum árum að ég var í menntaskóla þegar ég eignaðist hana. En núna á síðari árum hef ég oftar en ekki notast við uppskrift sem ég fann á vefnum cookography.com.

Ég ætla að deila með ykkur uppskriftinni þaðan, hún er himnesk.

http://www.cookography.com/2008/the-best-french-onion-soup-ever

Uppskriftin á tenglinum hér að framan er reyndar horfin en hér er mjög svipuð uppskrift:

Caramelize Onions: Heat olive oil and butter in a pot over medium heat. Add onions and cook, stirring occasionally, for 10 minutes. Sprinkle with sugar and cook uncovered, stirring occasionally, for 30-40 minutes until caramelized and browned. Add garlic and cook for 1 more minute.

Deglaze and Simmer: Add sherry, scraping the pot to deglaze. Stir until sherry is evaporated (3 minutes). Add beef stock, bay leaf, thyme, and 1 tsp salt. Simmer partially covered for 30 minutes. Adjust seasoning with remaining salt and pepper.

Prepare Croutons: Preheat oven to 400°F. Slice baguette and brush with olive oil. Bake for 6-8 minutes until golden brown.

Assemble and Broil: Top baguette slices with half the cheese and broil for 2-3 minutes until melted and golden.

Serve: Pour soup into bowls, sprinkle with remaining cheese, and top with cheesy toasts.

 

 

Saltkjöt og baunir

by

Posted:

Í allmörg ár hef ég boðið systkinum mínum og börnum þeirra til mín í saltkjöt og baunir á sprengidag. Er þetta nú orðið að hefð sem ég hef ekki í hyggju að láta af.

Ég bý nú aðeins í 3ja herbergja íbúð en samt hafa 20-30 manns rúmast þar ágætlega enda má segja að einskonar vaktaskipti eigi sér stað, sumir koma snemma og aðrir seinna. Við samnýtum diska og svo er bara vaskað upp þegar hver og einn hefur lokið sér af. Það er allt hægt ef viljinn er fyrir hendi!

Ég beiti ósköp hefðbundnum aðferðum við að útbúa saltkjötið og baunasúpuna. Sýð 2-3 feita bita í súpunni og bæti soði úr kjötpottinum í súpuna til að gefa henni kraft. Alltaf set ég 2 -3 lauka í súpuna og er jafnvel farin að setja þá heila útí enda er súpan soðin svo lengi hjá mér að þeir leysast upp í öreindir sínar.

Það má kannski segja að sérstaða mín í þessum rétti felist í því að ég mauksýð kjötið þannig að það beinlínis dettur af beinunum. Beikon nota ég sparlega, mér finnst það ekki nauðsyn og það er ekki stórmál ef ég gleymi að setja það með í innkaupakörfuna.

Baunirnar er ég löngu hætt að leggja í bleyti. Þær fá langan suðutíma eins og allt annað (3-4 tíma) og eftir um 2ja tíma suðu stappa ég þær í pottinum með kartöflustappara og leysi þær þannig upp.

Í ár koma 23 í mat til mín. Ég keypti rúm sjö kíló af kjöti, þar af vel af síðubitum sem við systur elskum, 3 poka af baunum, 3 lauka og pakka af beikoni. Ég er ekki viss um hvort ég nota allar baunirnar en ég nota líklega bara 2 lauka og hluta af beikoninu.

Myndir koma inn síðar.

Þorrablót

by

Posted:

Þó ég sé mikilll matgæðingur þá hef ég aldrei verið sérlega hrifin af þorramat, þ.e.a.s. súrmeti. Mér finnst það beinlínis vont. En ég hef gaman að mannamótum og tek því þorranum og þeim blótum sem honum fylgja fagnandi.

Nk. laugardag, 18. febrúar, verður þorrablót niðja Lárusar Kirstins Hinrikssonar og Guðnýjar Sigríðar Hjálmarsdóttur föðurforeldra minna. Við hittumst síðast frændsystkinin í jarðarför elstu dóttur þeirra, Valgerðar Lárusdóttur, sem var fyrst systkinanna til að kveðja þennan heim. Af því tilefni sammæltumst við um að hittast við gleðilegra tilefni næst og úr varð þorrablótið á laugardag.

Við verðum ríflega 50 talsins niðjarnir og makar þeirra en við ákváðum að hafa aldurstakmark við ökuskírteini svona til þess að hneyksla ekki yngsta hópinn. Ég held að það hafi verið góð ráðstöfun.

Hvað um það ég hlakka mikið til hittingsins og vona að ég geti fært ykkur góð tíðindi frá þorrablótinu eftir helgina!

Chilli pottréttur

by

Posted:

Ég hef alla tíð verið verið hrifin af mat sem er eldaður í einum potti. En til þessa hef ég aldrei búið til chilli. Í kvöld varð breyting þar á – ég lét mig hafa það að skella í minn eigin frumlega chilli rétt og niðurstaðan var mér sannarlega að skapi.

Eftirfarandi er um það bil það sem þarf í réttinn og ég myndi halda að þetta dygði fyrir 4-5.

  • Nautahakk (1 pk)
  • Kjúklingabaunir (1 dós)
  • Gulrætur, sneiddar (4 stk)
  • Sellerí, sneiddur (1-2 stönglar)
  • Rauðlaukur, smátt sneiddur (1 stk)
  • Hvítur laukur, smátt sneiddur (1 stk)
  • Hvítlaukur, smátt sneiddur (4 rif)
  • Chilli pipar, smátt sneiddur (2 stk)
  • Taco krydd í pakka (ég notaði reykt chilli og hvítlauk)
  • Tómat púrré (1 dós)
  • Ólífuolía eða Isio 4
  • Vatn

Laukurinn (allar tegundirnar) er sneiddur niður og mýktur í olíu í þykkbotna potti. Þá er kjötið sett útí og steikt með lauknum í ca. 5 mínútur áður en gulrætur, sellerí og chilli piparinn bætist við. Kjúklingabaunirnar eru skolaðar úr köldu vatni og settar útí pottinn. Því næst er kryddið sett útí en þá þykknar rétturinn og þá kemur vatnið sterkt inn. Þynnið réttinn þar til hann hefur náð þeirri þykkt sem þér finnst æskileg. Að lokum er tómat púrré sett útí pottinn og blandað vel saman við. Þetta er síðan látið malla í um 5-10 mínútur áður en það er borið fram með taco skeljum og sýrðum rjóma.

Verði þér að góðu.

Ljóta baunasúpan

by

Posted:

Af einskærri leti réðist ég í tilraunaeldhús í kvöld. Í hádeginu í dag var boðið uppá þorramat í vinnunni og ég var búin að salta mig í spað svo ég setti í eina holla grænmetissúpu.

En af því að ég hef aldrei gert þessa súpu fyrr og af því að ég vildi prufa eitthvað nýtt (var sko með símann hjá pizzufyrirtækinu hjá mér) þá gramsaði ég smá stund í ísskápnum og efri skápum.

Útkoman varð ljótasta súpa sem ég hef nokkru sinni séð, en hún var ágætlega bragðgóð og þegar mér hefur tekist að finna leið til að gera hana huggulegri útlits mun ég sjálfsagt reyna aftur.

Eftirfarandi hráefni fór í súpuna:

  • laukur, sneiddur
  • púrrulaikur, sneiddur
  • sellerí, skorið í bita
  • hvítkál, sneitt
  • gulrætur, skornar í bita
  • kartöflur afhýddar og skornar í bita
  • nýrnabaunir úr dós
  • kjúklingakraftur
  • vatn

Ég byrjaði á því að svissa laukinn í olíu í potti, setti síðan sellerí og hvítkál með. Þvínæst skolaði ég nýrnabaunirnar og setti síðan í pottinn ásamt vatni þannig að það flaut yfir það sem var komið í pottinn. Þá setti ég gulrætur og kartöflur útí, bætti við örlitlu vatni og setti kjúklingatening í pottinn (1 knorr teningur passar í súpu fyrir 4).

Þvínæst hrærði ég aðeins í pottinum, setti lokið á og leyfði þessu að malla í ca. 15 mínútur.

Þegar ég tók lokið af pottinum brá mér verulega, þetta var sú ljótasta súpa sem ég hef augum litið og var komin með númerið hjá pizzuframleiðandanum í hugann en ákvað engu að síður að smakka og viti menn, þetta var prýðilega góð súpa.

Bráðhollur fiskur í ofni

by

Posted:

Í kvöld tók ég skafið úr skápnum tilraunaeldhús. Af því það er mánudagur ákvað ég að prufa að gera eitthvað gott og bráðhollt úr fiski sem ég átti í frystinum og viti menn – þetta var svona líka asssgoti gott!

Í réttinn notaði ég:

  • Ýsu, roðlaus og beinlaus
  • Kartöflur, afhýddar og skornar í bita
  • Gulrætur, flysjaðar og skornar í bita
  • Púrrulauk, sneiddan í þunnar sneiðar
  • Ost (ég átti bara frosna sneið af brauðosti sem ég notaði)
  • Sítrónuolíu (smá slettu)
  • Sveppasósu úr pakka
  • Salt

Ég byrjaði á því að gera grænmetið klárt, raðaði því síðan í botninn á eldföstu móti og setti smávegis af sítrónuolíu yfir. Fiskinn skar ég í bita og lagði ofaná grænmetið. Þvínæst hrærði ég saman sveppasósu úr pakka og vatni og hellti yfir fiskinn í fatinu. Þar á eftir sáldraði ég osti sem ég hafði mulið niður beint úr frystinum yfir herlegheitin.

Ég setti álpappír yfir fatið (til að halda soðinu inni) og bakaði í 200°C ofni í ca. 20-25 mínútur.

Ég færði fiskinn og grænmetið uppá disk og hrærði síðan í soðinu sem var eftir í eldfasta mótinu. Við það þykknaði sósan/soðið og ég hellti því yfir fiskinn á diskinum mínum.

Geggjað!

ps. ég ætlaði að taka mynd af þessum huggulegheitum en græðgin bar mig ofurliði og ég var búin að gúffa þessu í mig áður en mér gafst ráðrúm til að draga fram myndavélina ;-).

Katalónskur saltfiskréttur

by

Posted:

Halldór Halldórsson formaður Sambands íslenskra sveitarfélaga og fv. bæjarstjóri á Ísafirði sendi mér þennan rétt. Hann segir eftirfarandi um réttinn:

Sérstakt bragð er af þessum saltfiskrétti. Samspil saltfisks, beikons og rósmaríns er mjög gott og hentar því vel að drekka bragðmikið rauðvín með réttinum. (Fyrir þá sem vilja drekka vín með slíkum rétti. Hvítvín er auðvitað gott líka en þetta byggir vitanlega á smekk hvers og eins).

Continue Katalónskur saltfiskréttur

Kjúklingalundir í raspi

by

Posted:

Kjúklingalundir í raspi, bakaðar í ofni með Ljúflingi og chilisultu.

Þriðjudagur 3. janúar 2012

  • Kjúklingalundir
  • Egg
  • Raspur
  • Olía
  • Ljúflingur (ostur frá Kú)
  • Chilisulta
  • Krydd (salt, pipar og hvítlaukskrydd)
  • Hrísgrjón (kryddhrísgrjón)

Ég átti nokkrar kjúklingalundir í frystinum, þegar ég kom heim kl. 16.30 afþýddi ég þrjár lundir, skar hverja þeirra í þrjá hluta, baðaði þær uppúr eggjahræru og velti uppúr raspi sem ég hafði kryddað með salti, pipar og hvítlauksalti.

Ég setti smá olíu í botninn á eldföstu móti setti kjúklingabitana þar í og sneiddi svo nokkra bita (ekki of mikið) af Ljúflingi, sem ég átti í kælinum, þar ofaná. Þá setti ég smá slettur af chilisultu með í eldfasta mótið. Að lokum setti ég örlítið af ólívuolíu ofaná raspaðar lundirnar.

Þetta setti ég inní 220° heitan ofn og lét malla þar í 20-30 mínútur. Meðan kjúllinn var að bakast sauð ég smávegis af hrísgrjónum í litlum potti. Ég notaði kryddhrísgrjón sem ég hafði keypt í stórum dunki í Kosti, mjög góð.

Ég nota þá aðferð við að sjóða hrísgrjónin að láta suðuna koma upp í pottinum en slekk þá undir og leyfi grjónunum að malla á heitri pönnunni í a.m.k. 15 mínútur og hef lokið á pottinum.