Lamb Vindaloo

by

Posted:

  • 1 kg. lambakjöt skorið í um 4 cm bita
  • 100 ml. Rauðvínsedik
  • 2 msk sólblómaolía
  • 2 tsk salt
  • 500 gr kartöflur, flysjaðar og skornar í um 2,5 cm bita

Sósan

  • 125 ml. Sólblómaolía
  • 4 laukar, 3 smátt skornir og 1 sneyddur
  • 6 hvítlauksrif, gróft skorin
  • 3 rauð chilli, skorin gróft
  • 25 gr. Engifer, flysjuð og gróft skorin
  • 1 msk. Sinneps duft
  • 1 msk. Cumin
  • 1 msk. Kóríander (krydd)
  • 1 msk. Paprika
  • 2 tsk. Túrmerik
  • 2 tsk. Cayenne pipar
  • 1 tsk cinnamon … kanill
  • 2 tsk salt
  • 2 lárviðarlauf

Blanda saman edikinu og olíunni í skál þar til það hefur blandast vel. Bæta við lambinu og leyfa því að marinerast í  a.m.k. 2 klst.

Hita ofninn í 180 gráður

Fyrir sósuna á að hita þrjár matskeiðar af olíunni í steikarpönnu og steikja sneidda laukinn á miðlungs hita í um 15 mínútur þar til hann er létt brúnaður

Setja skorna laukinn, hvítlaukinn, chilli, engifer, sinnepsduftið, cumin, kóríander, papriku túrmerik, cayanne pipar og kanil í matvinnsluvél og blanda þar til það hefur maukast saman.

Bæta maukinu saman við laukinn, bæta við tveimur matskeiðum af olíu og elda í um 5 mínútur eða þar til þetta fer að taka lit. Taka af pönnunni og setja í pott.

Taka lambið úr marineringunni en geyma löginn. Setja pönnuna á hitann aftur og bæta við tveimur matskeiðum af olíunni. Steikja lambið í nokkrum skömmtum við miðlungshita, snúa öðru hvoru þar til þetta er létt brúnað. Bæta við meiri olíu ef þarf. Setja lambið í pottinn.

Hella afganginum af marineringunni í opttinn, bæta við salti og lárviðarlaufum og láta suðuna koma upp. Setja bökunarpappír ofaní pottinn og láta malla í um 45 mínútur í ofninum.

Taka pottinn úr ofninum og hræra kartöflunum í blönduna. Setja lokið aftur á og bökunarpappírinn og elda áfram í um klukkustund þar til lambið og kartöflurnar eru mjög mjúkar. Smakka til með salti.

Bera fram með jógúrt, kóríander, hrísgrjónum og heitu naan brauði.

Krydd hrísgrjón

by

Posted:

  • Basmati hrísgrjón (500 gr.)
  • Laukur (smátt skorinn)
  • Smjör (væn klípa)
  • 8 cloves (negulnaglar)
  • 4 kardimommur
  • 1 kanilstöng
  • 2 lárviðarlauf
  • Saffran þræðir
  • 650 ml heitt kjúklingasoð

Þvo hrísgrjónin vel í köldu vatni og leyfa þeim að liggja í vatni í um 30 mínútur.

Steikja laukinn í smjöri í um 5 mínútur þar til mjúkur. Bæta við kryddinu, saffran og lárviðarlaufi í nokkrar mínútur enn. Setja hrísgrjónin útí og hræra þar til þau eru böðuð í smjörinu áður en heitu soðinu er bætt í ásamt smá salti.

Sjóða með lokið á, lækka hitann og láta sjóða í um 10 mínútur þá er slökkt undir en potturinn skilinn eftir á heitri plötunni. Ekki taka pottinn af fyrr en 5 mínútum áður en bera á hrísgrjónin fram.

 

http://www.bbc.co.uk/food/recipes/fragrantpilaurice_67870

 

 

Konráð Kristinsson – minning

by

Posted:

Að eiga vin er vandmeðfarið,
að eiga vin er dýrmæt gjöf.
Vin, sem hlustar, huggar, styður,
hughreystir og gefur von.
Vin sem biður bænir þínar,
brosandi þér gefur ráð.
Eflir þig í hversdagsleika
til að drýgja nýja dáð.

(Ingibjörg Sigurðardóttir)

 

Konni gamli og IngóLjóðlínurnar hér að ofan gætu allt eins hafa verið samdar um okkur Konráð Ó. Kristinsson, minn kæra vin sem verður til grafar borinn í dag. Við Konni gamli, eins og hann var jafnan nefndur til aðgreiningar frá Konráð syni sínum, vorum miklir og góðir vinir. Ekki aðeins vegna þess að Konni yngri var og er mágur minn og ekki aðeins vegna þess að við Konni gamli erum ákafir stuðningsmenn Breiðabliks, heldur líka og ekki síður vegna þess að við bárum gæfu til þess að frá fyrstu tíð voru samskipti okkar mörkuð af virðingu fyrir hvoru öðru.

Continue Konráð Kristinsson – minning

Hálf indverskur fiskréttur

by

Posted:

Mig langaði í fisk í dag, miðvikudag. Reyndar svo að mig langaði í fisk strax, þó klukkan væri bara ríflega 17 og ísskápshurðin var rifin uppá gátt. Þar átti ég lauk, hvítlauk, og tómata … já og fisk að sjálfsögðu. Þegar ég sá þessi innihaldsefni rifjaðist upp fyrir mér leiðbeining sem ég fékk um daginn frá vertinum á Bombay Baazar í Hamraborg um daginn. Úr varð þessi hálf indverski fiskréttur.

Innihald:

  • laukur
  • hvítlaukur
  • engifer
  • tómatar
  • gulrót
  • þorskur
  • salt
  • pipar
  • túrmerik
  • paprika
  • olía til steikingar

Ég byrjaði á því að saxa laukinn mjög smátt, raspaði niður bút af engifer og maukaði tómata í matvinnsluvél. Þá hitaði ég olíuna vel, setti laukinn útí og síðan túrmerikið og paprikukryddið. Þessu leyfði ég að malla í smá stund en þá setti ég tómatblönduna útí pottinn og leyfði suðunni að koma upp.

Á meðan það sauð sneiddi ég gulrót niður í þunnar sneiðar og setti útí. Eftir ca 10 mínútur fór þorskurinn sem ég hafði brytjað niður í munnbita út í pottinn og stóð þar í ca. 5-7 mínútur. Þvínæst kryddaði ég með salti og pipar.

Þetta er frábært að bera fram með hrísgrjónum og góðu brauði.

Mjög gott

Hani í víni – Coq au Vin

by

Posted:

Í kvöld bauð ég nokkrum vinnufélögum í tilraunaeldhús Ingibjargar. Það er skemmst frá því að segja að það heppnaðist svona líka glimrandi vel. Maturinn bragðaðist ljómandi vel og héðan fóru gestirnir þokkalega saddir og sælir.

Í forrétt bauð ég Blaðlauks-þjöppu með serranóskinku og valhnetu sósu og í aðalrrétt var hani í víni, Coq au Vin. Hér kemur sú uppskrift.

Það sem þarf í mína útgáfu af réttinum er:

  • Kjúklingabitar
  • Beikon
  • Perlulaukur
  • Sveppir
  • Rauðvín
  • Ólífuolía
  • Smjör
  • Hveiti
  • Salt
  • Pipar

Ég byrjaði á því að taka utan af 30 perlulaukum, sneiða niður beikonið og þvo sveppina. Þá hitaði ég ólífuolíu og smjör í þykkbotna potti og steikti beikonið og perlulaukinn í um 5-6 mínútur en setti svo sveppina útí þar á eftir og leyfði þeim að malla með í um 3-5 mínútur. Því næst tók ég þetta úr pottinum og setti til hliðar.

Því næst setti ég hveiti í poka, saltaði og pipraði og velti svo kjúklingabitunum uppúr hveitinu. Þá steikti ég bitana í pottinum og tók þá uppúr þegar þeir voru brúnaðir á öllum hliðum. Því næst hellti ég einni flösku af þokkalega góðu rauðvíni út í pottinn og lét það sjóða niður í um 10-12 mínútur. Þá setti ég kjúklingabitana útí aftur og lét þá malla í pottinum í tæpa klukkustund. Eftir það skellti ég sveppum, lauk og beikoni út í pottinn og leyfði því að malla í um 20 mínútur til viðbótar.

Þetta er síðan borið fram eins og það er, en skv. uppskriftinni átti að skreyta með kóríander og brauðteningum en ég gleymdi því í ísskápnum.

Ljómandi gott – já einfalt og gott.

Ólafur E. Rafnsson – In Memoriam

by

Posted:

Ólafur E. Rafnsson, forseti ÍSÍ, var borinn til grafar í dag. Við Óli þekktumst ekki mikið en hann var maðurinn hennar Gerðar, vinkonu minnar og skólasystur. Óli hafði einstaka nærveru og þá sjaldan við hittumst var alltaf eins og við þekktumst vel og værum bestu vinir. Óli var líka mannvinur af bestu gerð og það sást vel í útför hans í dag að hann var ákaflega vinamargur.

Óli nælir í mig silfurmerki ÍSÍ 2010
Óli nælir í mig silfurmerki ÍSÍ 2010 og ég horfi aðdáunar augum á hann.

Continue Ólafur E. Rafnsson – In Memoriam

Dýrindis grænmetis-/fiskisúpa

by

Posted:

Ég var staðráðin í að gera fiskisúpu í kvöld. En eins og svo oft áður þá datt mér ekki í hug að fylgja uppskrift heldur byggði ég á fyrri reynslu minni í fiskisúpugerð og ber þar hæst að nefna uppskrift Rúnars Marvinssonar. Þá súpu fékk ég fyrst í vinnunni og ég verð bara að segja að það var besta fiskisúpa sem ég hef smakkað.

Í þessa súpu notaði ég í grunninn það sem alltaf er notað, lauk, hvítlauk, gulrætur og sellerí. Þar fyrir utan er í súpunni túrmerik (sem bætir geð og léttir lund), salt og pipar. Að auki setti ég í súpuna kartöflur, engifer, hvítlauksost, niðursoðna plómutómata, karrý, hálfan grænmetistening og paprikuduft. Þar með er það upptalið. Engin mælistika sett á þetta, bara smakkað til eftir smekk og geði. Auðvitað fór í þetta líka eitthvað af vatni.

Þegar ég var að sjóða þetta grænmeti allt saman þá fór ég að hugsa um súpurnar sem fást á súpubarnum. Þær eru oft mjög matarmiklar og dálítið þykkar undir tönn. Það sem gerir þær þannig er að þær eru maukaðar í matvinnsluvél og þar sem ég hef nýlega eignast eina slíka þá veiddi ég megnið af grænmetinu uppúr pottinum og maukaði það.

Þegar allt var soðið saman setti ég fisk í botn á skál, ég átti þorsk og örlítið af lúðu og hellti svo súpunni yfir. Þetta borðaði ég af einstaklega góðri lyst, enda var þetta sérlega lystug og góð súpa. Ef einhver vill ekki fisk í súpuna þá stendur hún alveg undir nafni sem grænmetissúpa.

Já svona líka ljómandi gott.

Fiskiostasúpa

by

Posted:

Eftir heldur erfiðan dag skellti mín í eitt tilraunaeldhús. Að þessu sinni átti ég fisk, ýsu, og mig langaði að gera eitthvað allt öðruvísi. Það varð líka raunin og heppnaðist svona líka ægilega vel. Já Fiski Osta Súpa … skrítið en gott.

Innihald

  • laukur
  • sellerí
  • hvítlaukur
  • gulrætur
  • kartöflur
  • brokkólí
  • rauð paprika
  • tómatar
  • ólífuolía
  • hvítlauksostur (steyptur)
  • mjólk
  • grænmetiskraftur
  • salt
  • pipar
  • túrmerik
  • karrý
  • ýsa eða annar góður fiskur
  • parmessanostur

Ég byrjaði á því að steikja laukinn og gulræturnar í olíunni og bætti svo smám saman öðru grænmeti saman við eftir því sem leið á. Gætið þess að hafa ekki of háan hita á pottinum ef þið eruð ekki með allt grænmetið niðurskorið (eins og ég sem var að saxa þetta niður jafnóðum). Bætið síðan ostinum útí og svo mjólk, má örugglega líka nota vatn og/eða rjóma. Því næst er þetta allt kryddað til og smakkað. Þegar grænmetið hefur tekið sig og þú ert orðin sátt(ur) við bragðið er fiskurinn skorinn í bita og settur útí og látinn malla í örfáar mínútur.

Súpan er síðan borin fram með rifnum parmessanosti og góðu brauði ef það er til 🙂

Verði þér að góðu!

Fiskiostasúpa
Fiskiostasúpa

Ljómandi gott andasalat – andabringusalat

by

Posted:

Um daginn fékk ég eðalgóða gesti í mat. Hingað mættu þrír vinnufélagar mínir og eiginkona eins þeirra. Tilefnið var að ég hef ákveðið að bjóða öllum mínum vinnufélögum í tilraunaeldhús til mín á árinu 2013 og var þetta fjórði hópurinn sem mætir.

Að þessu sinni var önd meginþemað í kvöldverðinum. Fyrst fengu þau Pekingönd sem þau vöfðu sjálf inní kínverska pönnuköku og borðuðu með vorlauk, agúrku og Pekingandasósu.

En á eftir fengu þau andasalat, sem var hið raunverulega tilraunaeldhús kvöldins því hinn réttinn hef ég eldað a.m.k. tvisvar sinnum áður.

Andabringusalat Dollýar

  • 2 andabringur
  • Lambhagasalat
  • Rukolasalat
  • 3 plómutómatar
  • 1/2 rauð paprika
  • 1/2 box íslensk jarðaber
  • 1/2 box innflutt bláber
  • 1/2 granatepli

Ég byrjaði á því að skera rendur í fituna á andabringunum, svona tígla þannig að fitan ætti auðvelt með að renna úr henni við eldun. Þvínæst makaði ég vel af Five spice kryddi sem ég átti til í skápnum hjá mér en ég keypti það í austurlensku búðinni á Laugaveginum fyrir um 2 árum síðan. Þetta voru síðustu droparnir af því góða kryddi.

Bringurnar marineruðust í kryddinu í hálfan sólarhring.

Þegar ég eldaði þær þá setti ég þær á blússandi heita en þurra pönnu með skinnið niður og lét þær malla í ca 3 mínútur áður en ég lækkaði hitann og lét þær liggja á skinninu í um 5-10 mínútur til viðbótar – passið bara að skinnið brenni ekki. Þegar skinnið er orðið stökkt og fínt þá hellti ég andafitunni af pönnunni, sneri bringunum við og leyfði þeim að malla á pönnunni í um 10 mínútur til viðbótar. Gætið að því að þá á pannan að vera komin niður í meðalhita.

Salatinu blandaði ég saman að hætti hússins og þegar andabringurnar voru tilbúnar leyfði ég þeim að hvílast í um 10 mínútur áður en ég sneiddi þær í þunnar sneiðar og raðaði á salatið.

Þetta var ekki bara fallegt heldur líka guðdómlega gott salat.

Bon appetit!

Kjúklingasúpa að hætti Dollýar

by

Posted:

Dollý dró fram dressið í kvöld og eldaði kjúlingasúpu. Ég veit að þú vilt fá uppskriftina og hún er til.

Innihald:

  • kjúklingabringa skorin í frekar litla bita
  • 1,0-1,5 ltr vatn í pott
  • 1 væn gulrót sneidd
  • brokkólí eins og þér finnst passa
  • 1 hvítlauksgeiri smátt skorinn
  • 1 kjúklingateningur frá knorr
  • sesamolía
  • sojasósa

Vatnið sett í pott og suðan látin koma upp. Gulrótin, spergilkál (brokkólí), hvítlaukurinn og teningurinn sett útí og látið sjóða í 5 mínútur. Kjúklingurinn settur útí. Látið sjóða í 5 mínútur og smakkað til með sesamolíu og sojasósu.

Ég bætti smá núðlum út í súpuna og þegar þær voru soðnar var súpan færð uppá disk og etin af svo góðri lyst að myndataka gleymdist.

Verði þér að góðu!