Grænmetisréttur sem er ekkert grín

by

Posted:

Vá maður hvað ég eldaði góðan mat í kvöld. Fyrir viku síðan sagði Rut Steinsen, vinnufélagi minn og handboltasnillingur, mér frá geggjuðum grænmetisrétti sem hún hafði eldað. Í hann notaði hún eggaldin, kúrbít, tómata, hvítlauk, papriku, sveppi og lauk. Ég gat að sjálfsögðu ekki farið eftir þessu og gerði eftirfarandi:

  • eggaldin
  • brokkolí
  • gulrót
  • rauð paprika
  • sellerí
  • hvítlaukur
  • ólífuolía
  • hvítlauksolía frá Pottgöldrum
  • parmessan ostur
  • salt
  • pipar
  • túrmerik (já nota það í allt þessa dagana)

Ég sneiddi eggaldinið niður langsum eftir ávextinum, brytjaði brokkolí og skar papriku (sem ég hafði reyndar grillað í ofninum áður og flett húðinni ofanaf), gulrót og sellerí í frekar þunnar sneiðar. Tók eitt hvítlauksrif, marði það og sneiddi niður. Þetta setti ég í ofnfast mót og staflaði hverju ofan á annað, en þegar ég sá að það virkaði ekki þá tók ég ofnfasta mótið úr ofninum, setti bökunarpappír í ofnskúffu og dreifði úr þessu þannig að á hverri sneið af eggaldin var smátterí af öllu hinu.

Ofaná þetta setti ég ólífuolíu og hvítlauksolíu, salt, pipar og túrmerik og bakaði í ofninum við 180 gráður í um 45 mínútur. Þá tók ég þetta aftur úr ofninum sneiddi parmessanost ofaná og bakaði aftur í 10-15 mínútur eða þar til osturinn var bráðinn.

Ok, ég svindlaði smá og henti einu kebabbuffi, sem ég átti frosið, inní ofninn með þessu og borðaði með. En það þarf þó alls ekki.

Geggjað gott – og óendanlega heilbrigt!

Himneskur grænmetisréttur að hætti Rutar Steinsen. Auðvitað eldaður eftir mínu höfði.
Himneskur grænmetisréttur að hætti Rutar Steinsen. Auðvitað eldaður eftir mínu höfði.

Grillað lambafillet með dásemdar salati

by

Posted:

Í gærkvöldi hitti ég vinkonur mínar Ástu B. og Dísu í Hárný. Tilgangur hittingsins var að horfa á landsleikinn hjá strákunum en svo gleymdum við okkur við mat og drykk.

Ég tók svo fína mynd af matnum á símann minn að ég varð að skrifa niður “uppskriftina” en samt er þetta eiginlega ekki alveg uppskrift. Meira svona hugleiðing.

Þannig var að ég hef margoft fylgst með matreiðsluþáttum, lesið matreiðslubækur og flett upp uppskriftum á netinu. Alltaf öðru hvoru hef ég rekist á uppskriftir þar sem búið er til dásemdar salat og svo er kjöt borið fram með salatinu, ýmist í salatskálinni sjálfri eða til hliðar. Í gær langaði mig í svona mat.

Ég kom við í Krónunni á leiðinni til Ástu og keypti:

  • Lambafillet
  • Spínat
  • Rúkóla salat
  • Jarðaber
  • Bláber
  • Papriku, rauða

Heima hjá Ástu var til ýmislegt fleira í salatið, s.s. kasjúhnetur og svo auðvitað krydd og olía og hún galdraði fram dýrindis marineringu á kjötið sem ég held að hafi að mestu innihaldið hvítlauk og ólívuolíu og svo auðvitað allskonar krydd. Við nýttum marineringuna líka á salatið sem dressingu og það var algjör snilld.

Hér að neðan má sjá mynd af dásemdinni – þetta var hrikalega gott!

Kjötsalat
Kjötsalat

Hollustusúpa Ingibjargar

by

Posted:

Það er nauðsynlegt að elda hollt öðru hvoru og í kvöld var skellt í úrvals holla og hreint fáránlega góða súpu. Eins og venjulega var ekkert mælt, bara slumpað í og svo skafið dálítið úr ísskápnum.

Upprunalega hugmyndin var að búa til grænmetissúpu með kjúklingabaunum en þegar á hólminn var kominn fengu baunirnar frí en kókosmjólk tekin fram í staðinn.

Innihald:

  • 1 laukur, saxaður
  • 2 hvítlauksgeirar, smátt skornir
  • 1 fennel haus, saxaður
  • 1 brokkolí – frekar lítill haus – skorinn í bita
  • 3 gulrætur, sneiddar
  • 1 sellerístöngull, sneiddur
  • 3 cm engifer, ferskt smátt saxað
  • 1/4 rauð paprika, söxuð
  • 2 þurrkaðir chillí pipar, rauðir (litlir), mulinn
  • vorlaukur, klipptur niður
  • 1 ds kókosmjólk
  • 1 kjúklingateningur
  • 1/2 ltr vatn
  • 2 tsk túrmerik (algjörlega nauðsynlegt fyrir skapsveiflurnar)
  • 1 tsk paprikuduft – EKKI reykt paprika
  • pipar
  • salt
  • ólífuolía

Jæja, ég byrjað á því að saxa niður grænmetið, hitaði 1-2 msk af ólífuolíu í þykkbotna potti. Grænmetið, allt nema brokkolíið, sett útí, svitað þar í 5-7 mínútur, túrmerikið og paprikuduftið sett útí og leyft að taka sig með grænmetinu. Þá hellti ég kókosmjólkinni útí, setti teninginn og vatnið og leyfði suðunni að koma upp. Smakkaði til með salti og pipar og á endanum setti ég brokkolíið útí, það þarf ekki langa suðu.

Ég bar þetta fram með sýrðum rjóma og kornflögum og drakk vatn með þessu.

Svona líka ljómandi gott.

Hollustusúpa Ingibjargar
Hollustusúpa Ingibjargar

Heilsubætandi matvæli og krydd

by

Posted:

Hér ætla ég að safna saman upplýsingum sem ég hef viðað að mér héðan og þaðan um heilsubætandi matvæli og krydd.

Turmeric

er vel þekkt krydd og er mikið notað í austurlenska matreiðslu. Færri vita þó að það er mjög svo heilsubætandi og hefur verið mikið rannsakað fyrir þær sakir. Á vefsíðunni: http://www.myhealthylivingcoach.com eru taldir upp sjö helstu þættir þess að túrmerik er talið svo heilsusamlegt. Þessir þættir eru:

  1. Andoxun
  2. Bólgueyðandi
  3. Hjartastyrkjandi
  4. Vinnur gegn Alzheimers
  5. Verkjastillandi
  6. Gott fyrir húðina
  7. Dregur úr líkum á krabbameini

Þar fyrir utan hef ég fyrir satt að túrmerik sé einstaklega gott til þess að draga úr pirringi og fleiri andlegum ónotum.

Meira um heilsubætandi matvæli og krydd á síðunni undir Uppskriftir hér að ofan.

 

Hollustu morgundrykkurinn

by

Posted:

Um daginn lagaði ég þennan líka dýrindis hollustu morgundrykk. Tilefnið var að Þórhallur Matthíasson, fyrrverandi nemandi og gildur limur í félagsmiðstöðinni Ekkó, montaði sig af hollustudrykk sem hann var að sjóða saman og ég gat ekki verið minni manneskja.

Í drykkinn minn fór:

  • 1 sítróna
  • 2 lime
  • 1 appelsína
  • 1 epli
  • 3 cm engifer
  • 1 sellerístöngull
  • 1 kanilstöng
  • 2 tsk. túrmerik
  • 2 ltr. vatn
  • 1/2 tsk. basilsalt – gróft

Ég sneiddi ávextina, engiferið og selleríið niður og setti í pott með vatninu og kryddinu og sauð í ca. 8-10 mínútur. Lét síðan standa í pottinum í góða stund áður en ég pressaði ávextina með kartöflustappara til að ná úr þeim safanum. Þá sigtaði ég vökvann í skál og hellti í flöskur. Þetta kældi ég svo niður og geymdi í ísskáp til morguns.

Mér finnst þetta ákaflega góður drykkur en það er alveg óhætt að auka aðeins við engiferið, það ætla ég a.m.k. að gera næst þegar ég sýð þennan dýrindisdrykk.

hollustudrykkur
Hollustudrykkurinn í flöskunum

 

 

Hollustudrykkur í potti
Hollustudrykkurinn í pottinum

30 ára stúdent

by

Posted:

1983
Útskriftarárgangur 1983, 30 árum síðar. Einstaklega fallegur hópur, gáfaður og svona líka bráðskemmtilegur.

 

Í formála Fagurskinnu sem gefin var út 1983 segir svo: „Ekki er nema eðlilegt að fjögur mikilvæg þroskaár í lífi ungs fólks skilji mikið eftir. Ótal mörg atvik verða minnisstæð, bæði brosleg og alvarleg og svona rit kemur aldrei til með að gefa nokkra heildarmynd og varla hugmynd um hvernig samband fólks er og andrumsloft innan veggja skólans.“

Þessi orð eiga sér svo sannarlega stað í raunveruleikanum. Þessi fjögur ár sem við eyddum innan veggja, ekki þessa húss, heldur hússins hér örlítið vestar í götunni eru sannarlega minnisstæð og við öll getum sjálfsagt rifjað upp bæði brosleg og alvarleg atvik sem áttu sér stað á námstíma okkar.

Continue 30 ára stúdent

Það kemur leikur eftir þennan leik

by

Posted:

Það hefur verið skemmtilegt að fylgjast með þeim viðbrögðum sem verið hafa við ágætum pistli Kolbrúnar Bergþórsdóttur í Morgunblaðinu.

Í pistlinum fer Kolbrún fáeinum orðum um viðbrögð vinnufélaga sinna við þeim tíðindum að knattspyrnustjóri Manchester United ætli sjálfviljugur að taka pokann sinn og leggja skóna á hina margfrægu hillu.

Sjálf er ég mikil áhugakona um knattspyrnu en ég hef fyrir löngu gert mér grein fyrir því að knattspyrna er bara leikur. Félagið mitt heitir Breiðablik og ég hef mikinn áhuga á því að félaginu mínu gangi sem best í öllum leikjum og hjá öllum flokkum. Þar liggur mín ástríða.

Continue Það kemur leikur eftir þennan leik

Kebablamb

by

Posted:

Tilraunaeldhús 11. maí 2013.

  • Fjórar sneiðar af framparti – úrbeinaðar og fitusneiddur
  • Hálfur vorlaukur – sneiddur
  • 3 hvítlauksgeirar – saxaðir smátt
  • 2 sellerístönglar – sneiddir
  • Laukur – sneiddur
  • Brokkólí – brotið niður í bita
  • Tómatur í dós með hvítlauk og óriganó
  • Salt
  • Pipar
  • Kebabkrydd

Þessu öllu raðað í eldfast mót í þeirri röð sem er talið upp hér að ofan og sett smá sletta af vatni með (þarf þó ekki). Þá lítur rétturinn svona út.

20130511_162339_resized

 

Þessu öllu pakkað inní álpappír og látið malla í ofni við 180 gráður í a.m.k. tvo klukkutíma – jafnvel lengur. Þegar rétturinn kemur úr ofninum lítur hann svona út en ég klippti niður tvo sprota af vorlauk ofan á fatið.

20130511_184359_resized

Með þessu væri voðalega gott að bera fram brauð en ég bauð uppá spagetti og hvítlauksost frá Philadelphia. Þetta var mjög, mjög gott.

Áður en fatið fór í ofninn

Verði þér að góðu!

 

 

Þórubrauð

by

Posted:

Þóra Björg Jónsdóttir er nýlega farin að vinna hjá sambandinu. Hún bakaði þetta dýrindis brauð á afmælisdaginn sinn og færði okkur.

  • 3 bollar hveiti
  • 3 bollar haframjöl
  • 2 bollar sykur
  • 1 tsk lyftiduft
  • 1 ½ tsk natron
  • 1 tsk engifer
  • 1 tsk negull
  • 1 ½ tsk kanill
  • 2 egg
  • tæpir 3 bollar súrmjólk/ab-mjólk

Allt hrært saman og sett í tvö stór form. Bakað við 175°C í 50-60 mínútur.

Ég hef prófað að minnka sykurinn um einn bolla og setja einn banana í staðinn, það er mjög gott líka en þá þarf aðeins minna af vökva.

 

 

Tyrkneskar kjötbollur með spagetti

by

Posted:

Ég verð að segja þér frá kvöldmatnum í kvöld.

Um daginn fór ég í búð í Síðumúla sem selur vörur frá Tyrklandi og keypti mér Kebab krydd, en ég lærði að meta Kebab í Danmörku fyrir tveimur árum. Ég man ekki hvað búðin heitir en hún er beint á móti Fastus.

Hef þó aldrei fundið almennilegt Kebab hér heima eftir það. En ég á ekki svona kebabtein þannig að ég googlaði og fann fullt af uppskriftum með allskonar hakki sem var sett utan á grilltein og grillað. Auðvitað gat ég ekki farið eftir uppskrift þannig að ég gerði þetta allt sjálf!

Ég rakst á kjúklingahakk … nei alifuglahakk heitir það … í Krónunni en þar sem það var ríflega hálft kíló var það full mikið fyrir þessa konu en eins og þú veist þá deyr mín ekki ráðalaus og á auk þess dálítið af vinnufélögum sem finnst ekki slæmt að fá smakk frá frökeninni.

Það sem ég gerði var sem sagt að setja hakkið í skál, setti vel af kebabkryddinu, blandaði smá hveiti og vatni saman við og hrærði vel. Ég hefði sett egg ef þau hefðu verið til í ísskápnum í staðinn fyrir vatnið en maður bjargar sér.

Þá bjó ég til litlar bollur úr hakkinu og steikti á pönnu á háum hita þannig að sæmileg skorpa kom á bollurnar. Þvínæst setti ég eina dós af hökkuðum tómötum út á pönnuna, pipraði vel og setti svo turmerik, af því að það minnkar pirringinn og við Svandís, vinnufélagi minn, erum í Turmerik meðferð.

Í ísskápnum mínum fann ég hálfa dós af Philadelpia smurosti og skellti honum á pönnuna enda hefði hann runnið út um helgina og það þurfti að nota hann. Þetta fékk að malla í smá stund á pönnunni.

Ég hafði, meðan á þessu öllu stóð, soðið spagetti í potti og skellti því þegar það var tilbúið á pönnuna og hrærði vel.

Þegar ég hafði fært þetta uppá disk setti ég vel af parmessanosti ofaná og svo gott dash af góðri ólífuolíu.

Ef ég hefði átt gott salat hefði það verið til þess að fullkomna máltíðina, en þetta er skal ég segja þér geggjað gott!

Innihald:

  • alifuglahakk
  • spagetti
  • hakkaðir tómatar úr dós
  • hveiti
  • vatn (eða egg)
  • kebab krydd
  • turmerik
  • pipar
  • ólífuolía
  • parmessanostur

Ef ég hefði ekki verið svona gráðug, hefði ég kannski náð bollunum á mynd áður en þær kólnuðu og urðu ekki alveg nógu myndarlegar. En internetið er dásamlegt og þar fann ég þessa fínu mynd sem sýnir þetta næstum því eins og það leit út hjá mér.

KjuklingabollurSpagetti

 

Ég vil bæta því við að í gær, uppstigningardag (9. maí 2013) eldaði ég kebab handa pabba gamla. Blandaði saman nautahakki, einu eggi, tvær teskeiðar af hveiti og góðum slatta af kryddinu. Ég hrærði þessu saman og hnoðaði í einskonar pylsu sem ég þræddi uppá grillspjót. Því næst setti ég það í ísskáp í 2-3 tíma.

Loks grillaði ég spjótin úti og bar þetta fram með pítubrauði, hvítlaukssósu, chillimauki, lauk, tómötum og papriku.

Mér fannst þetta geggjað gott og pabbi gamli var bara sáttur líka.