Category Archives: Ljóðin

Í minningu vinar – Friðjón Fannar Hermannsson

Í hverfulleika lífsins, hvergi finn ég skjól
hamingjan er ekki öllum gefin.
Því hugsa ég um ljósið er leggst ég í mitt ból
hvort lýsi það að morgni, þar er efinn.

Í dag fékk ég fréttir af óvæntu fráfalli vinar míns Friðjóns Fannars Hermannssonar. Hann var einn af strákunum mínum í Ekkó. Fjörmikill drengur, stuttur í annan endann en þeir voru svo sem fleiri þannig í þessum hópi. Hjálpsamur var hann og duglegur, enda skáti og félagsmálatröll hið mesta. Strax þarna, þegar hann er 13-15 ára gamall var ljóst að hann yrði, er hann yxi úr grasi, drengur góður eins og sagt er í Íslendingasögunum.

Friðjón var alltaf kankvís við gamla leiðbeinandann sinn úr Ekkó og Þinghól. Við hittumst gjarnan á vellinum, eitilharðir Blikar bæði tvö, og þó það liðu mánuðir og jafnvel ár var alltaf stutt í brosið, knúsið og krafturinn sá sami og í Ekkó forðum.

Friðjón er einn þeirra sem skilur eftir sig margar góðar og ljúfar minningar. Hans verður sárt saknað.

Ertu sátt? Segðu frá Dollý á þinni síðu

Kveðja frá Sirru frænku

Hún Sirra föðursystir mín, Sigrún Jóna Lárusdóttir, var mikil eftirlætisfrænka. Alltaf brosandi, alltaf hlý og alltaf svo skemmtileg. Hún kunni vísur og kvæði og var mjög liðtæk í vísnagerð.

Í kvöld (12.12.12) var ég að blaða í gegnum gömul jólakort þá rakst ég á kveðju frá henni og má til með að deila henni með ykkur. Sirra lést 16. júní í sumar eftir hetjulega baráttu við veikindi. Blessuð sé minning hennar.

 

Jólin 2007.

Ingó mín,

Ég vildi ég gæti verið við hlið þér örlitla stund
og fært þér fullt af blómum sem fegurst eru á grund.
En af því að allar óskir ekki geta ræst
þá verð ég bara að bíða þar til við hittumst næst.

Lífið það er ferðalag en aðeins ein ferð
sem allir verða að fara, en borga misjafnt verð.
Sumir borga meira – aðrir minna
En það er bara að brosa því bráðum kemur vorið
Þá batnar allt – þó fenni seint í sporið.
Kveðjan er til þín og allra hinna.

Bless, Sirra.

Ertu sátt? Segðu frá Dollý á þinni síðu