Breiðablikshörmungaröld

Eitt sinn fyrir margt löngu síðan, sennilega í kringum 1991-2, var ég að spjalla við ágæta konu, Kristrúnu Heimisdóttur KR-ing með meiru. Hún var eitthvað að hneykslast á góðu gengi Breiðabliks og það datt út úr henni að það væri Breiðablikshörmungaröld.

Það tók mig ekki langan tíma að yrkja eftirfarandi limru til hennar:

Ég spurði eina konu eitt kvöld
um hver hefði í deildinni völd.
Og hún svaraði mér;
„Ég segja skal þér,
það er Breiðablikshörmungaröld“

Það gerðist svo um 15 árum síðar að margir fyrrverandi KR-ingar voru orðnir liðsmenn Breiðabliks og þá ljóðaði ég á Kristrúnu:

Það birtist mér kona ein blíð
brosmild og undur fríð
hún hló við mér dátt
og sagði svo hátt:
„Það er Breiðabliksgleðitíð!“

Kristrún sendi mér enga athugasemd við þessa vísu, enda er ég ekki viss um að hún sé beint sammála þessu!

Enn liðu nokkur ár og aftur kom að því að Breiðablik vann KR á Meistaravöllum (2015), rústaði þeim reyndar, og Kristrún fer eitthvað að minnast á Breiðablikshörmugaröldina. Þá varð til þessi limra.

Það rann eitt sinn kona á KR-velli
kastaðist niður á grjóthörðu svelli
það kom á hana hik
“Er það Breiðablik
sem orsakar þess’ alla þungu skelli?”