Category Archives: Stjórnmál

Persónukjör

Ekki man ég eftir því að hafa verið í jafnmiklum erfiðleikum með að finna mér stað á hinu pólitíska litrófi eins og fyrir þessar kosningar. Samt er ég búin að setja niður lista þar sem ég tel upp nokkur þau atriði sem ég legg áherslu á í þessum kosningum:

  1. Landspítali við Hringbraut strax
  2. Úrbætur í húsnæðismálum, lifandi leigumarkaður
  3. Sanngjörn renta af auðlindunum
  4. Böndum komið á ferðamannaiðnaðinn
  5. Úrbætur í öldrunarmálum, mannsæmandi framkoma við eldri borgara
  6. Hófleg stefna í innflytjendamálum þar sem áhersla er á mannúð
  7. Rætt verði af alvöru um gjaldeyrismál og íslensku krónuna
  8. Kosið um aðildarviðræður við ESB

Sjálfsagt eru fleiri atriði sem ég gæti talið upp hér en eitt nefni ég þó sem mér finnst að eigi klárlega að vera framarlega á listanum góða og það er að kosningalöggjöfinni verði breytt í átt að persónukjöri. Ég er sannfærð um að margir kjósendur eru í sama vanda og ég, veit ekki alveg hvaða lista það á að kjósa því bæði eru ekki öll stefnumál flokksins manni að skapi og svo leynast þar einstaklingar sem ekki hafa nægilega skemmtilegan og góðan kjörþokka (kurteislega orðað – þú mátt nota hvaða orð sem þú vilt en ég treysti því að þú vitir hvað ég á við).

Það eru 11 listar í framboði – ellefu (eða eru þeir tólf?)!

Sumir geta ekki kosið A listann því þar er Páll Valur í framboði, aðrir geta ekki kosið B því þeir vilja að Willum þjálfi KR, C listinn er ómögulegur því Óttarr er pönkari og svo framvegis. Allir sínar hafa ástæður og eiga til þess fullan rétt. En það eru líka sumir sem vill helst kjósa þessa þrjá einstaklinga því þeir treysta þeim best allra, en geta það ekki því þeir eru ekki í “réttum” flokki.

Ég vildi gjarnan geta raðað saman því fólki sem ég treysti best til að stýra þjóðarskútunni og þér að segja þá er ég í þessum vandræðum vegna þess að á flestum listum eru einstalingar sem ég ber ekki fullt traust til.

Ég vil geta kosið fólk sem mér finnst deila skoðunum með mér sama hvar í flokki það stendur. Hver og einn stjórnmálamaður á að vera bundinn af sinni eigin sannfæringu en ekki festur á klafa flokksins. Ég er sannfærð um að ef tekið verði upp persónukjör þá muni stjórn landsins verða mun betri en áður. Persónukjör verður til þess að stjórnmálamennirnir okkar muni vanda sig meira, bæði innan þings og utan.

Þeirra eigin heiður er að veði.

Ertu sátt? Segðu frá Dollý á þinni síðu

Dollý spáir fyrir árinu 2014

Ég trúði því varla að sá tími ársins væri kominn þar sem ég skundaði í heimsókn til Dollýjar vinkonu minnar. En þangað hef ég komið á hverju ári síðustu sjö ár. Já áttunda árið var að renna upp og kvíðahnúturinn sem gjarnan hefur verið í maga mér þegar ég hef litið við var víðs fjarri.

DollyDollý tók mér fagnandi, knúsaði mig og kyssti um leið og ég heyrði hana muldra, “ætli hún hafi minnkað?”. Ég lét sem ég hefði ekki heyrt þetta enda búin að fá hundleið á þessum athugasemdum eftir framköllun ársins. Hún bauð mér þvínæst til sætis í stofunni og mætti með bjór í glasi handa mér. Ég afþakkaði pent og spurði hvort hún ætti ekki vatn.

-Vatn! Hvað meinar þú kona. Ef ég á að spá fyrir þig þá verður þú að gjöra svo vel og drekka mér til samlætis. Ég hef fylgst með þér á árinu og líst ekkert á þetta kjaftæði í þér að borða þetta helvítis hráfæði alltaf hreint.

– Ég borða nú ýmislegt annað, muldraði ég en áttaði mig þó fljótlega að hún   myndi ekkert hlusta á mig frekar en fyrri daginn.

Spáin gekk þokkalega

-Hvernig gekk mér í fyrra, spurði Dollý og starði djúpt í augun á mér.

-Þér gekk bara þokkalega. Árið verður lengi í minnum haft og veðrið var ákaflega vott um alla jarðarkringluna. Það var mikill snjór á norðurlandi en sem betur fer var lítið um snjóflóð. Þó skalf jörð ekki mikið þetta árið og enginn eldur reis úr jörðu. Pervertaháttur náði nýjum hæðum, þó ekki vestur í Hollywood heldur hér heima og í Englandi.

Þú hafðir rétt fyrir þér með hræringar í stjórnmálunum og sumir myndu segja að menn hafi gripið til allra ráða til að halda völdum. Einnig hefur Björt framtíð Guðmundar Steingrímssonar notið talsverðs fylgis þó það hafi verið heldur minna en útlit var fyrir um tíma. Bjarni náði kjöri sem formaður Sjálfstæðisflokksins og hann situr þar enn, sem er annað en þú spáðir.

Þú hafðir rétt fyrir þér með að tveir flokkar eru stærri en hinir fjórir minni sem eru á þinginu. Þú sagðir að árið yrði ekkert sérstakt íþróttaár en í raun var þetta mikið íþróttaár. Já og ég hélt partý, sagði ég og brosti.

Dollý frussaði framaní mig og hvæsti “Það var ekki verið að bjóða MANNI!”

Við þessu átti ég ekkert svar og sá þann kost vænstan að segja ekkert, enda virtist Dollý ekki muna að hún mætti algjörlega óboðin í veisluna. Ég þagði.
Maður lærir smá saman!

Pólitískt ár

Eftir að Dollý hafði sent mér drápsaugnaráð lyngdi hún aftur augunum og sagði
hægum róm

-Eigum við ekki að drífa í þessu.

-Jú endilega, sagði ég og kveikti á upptökutækinu.

see_hear_speak_1-Árið 2014 verður afar pólitískt ár hér heima. Það eru jú sveitarstjórnarkosningar og þar verður víða gríðarleg átök. Stjórnmálin verða persónulegri og harðskeyttari en nokkru sinni og athugasemdakynslóðin mun láta mikið að sér kveða. Hafa í frammi allskyns fullyrðingar sem standast enga skoðun. En þetta er afleiðing af því sem gerðist hér á síðasta ári, menn lofa og lofa og standa svo ekki við neitt.

Reykvíkingar, sem hafa tekið Besta flokkinn í sátt, vita ekki í hvorn fótinn þeir eiga að stíga fyrst Jón Gnarr er ekki í boði. Þeir kaupa ekki Björn Blöndal né Heiðu Kristínu en treysta heldur ekki gömlu fjórflokkunum. Píratar munu koma á óvart og beita óhefðbundnum kosningaáróðri. Þeir verða hinir raunverulegu sigurvegarar kosninganna og ná inn manni. Þeir muna þó ekki setjast í meirihluta í borginni að þeim loknum.

Sjálfstæðisflokkurinn mun ekki ná þeim árangri sem margir væntu eftir magurt gengi síðustu ár og áratugi, hann mun þó bæta við sig manni frá því sem nú er. Flokknum tekst illa að fela valdabaráttuna innan flokksins og armur Guðlaugs Þórs mun ná heljartökum á flokknum og hafa í hótunum við þá sem ekki eru með þeim í liði. Að sama skapi verður árangur VG og Samfylkingar ekki eins og
væntingar stóðu til. Mér sýnist þó að þeir haldi sama fjölda borgarfulltrúa og nú er og munu Björt framtíð og Samfylkingin mynda meirihluta í borgarstjórn.

Kjörsókn í Reykjavík verður með minnsta móti, traustið til stjórnmálanna er þverrandi og það sést vel á því hversu margir, eða fáir, mæta á kjörstað. Það
er eins og menn gleymi því að þetta fólk sem fer í pólitíkina það vill vel, það vill vel, sagði Dollý og dæsti.

Hún leit síðan á mig og ég sá blik í augum hennar, skyndilega segir hún.

southern_comfort_manhattan-Hvernig er það eiginlega, á ekkert að bjóða manni drykk, frekar en í þetta
helvítis afmæli?

-Ha, jú auðvitað. Ég kom með jólavín sem ég bjó til. Viltu smakka það?

-Jólavín … hvur andskotinn er það eiginlega. Láttu mig fá flöskuna.

Ég gerði eins og ég var beðin um og rétti henni flöskuna. Hún lyfti flöskunni upp að ljósinu og hnussaði.

-Það tók því nú varla að koma með þetta smáræði.

Jag vill leva jeg vill dö i Norden

Því næst tók hún gúlsopa beint úr flöskunni, fyrst tók ég andköf enda vínið sterkt og þvínæst tók Dollý andköf, hóstaði, lyfti flöskunni aftur upp að ljósinu og sagði svo:

-Þetta er ágætt, minnir mig á Gammel dansk. Ja for helvede, nu tænker jeg om
Danmark. Du gamle du fria, du fjällhöga nord!

-Þetta er reyndar sænski þjóðsöngurinn, segi ég og sé samstundis eftir því þegar ég fæ enn eitt augnatillitið frá vinkonu minni sem heldur áfram að syngja. Ég sé þann kost vænstan að taka undir með henni í lokalínunni:

-Ja, jag vill leva jag vill dö i Norden!

Kratarósin

Dollý brosir blítt og klárar úr flöskunni. Ég sé að vínið svífur hratt á hana
og spyr hana út í önnur sveitarfélög en Reykjavík.

-Hvaða asi er þetta kona. Og hvað meinar þú “önnur sveitarfélög”? Þú ert bara
að meina Kópavog er það ekki?

-Jú, ég hef auðvitað mikinn áhuga á Kópavogi, viðurkenni ég.

-Þar er sami grautur í sömu skál, segir Dollý, en ég sé glampann í augunum á
henni. Hún er að stríða mér.

-Það er náttúrulega sjónarsviptir af Gunnari Birgissyni. Hann hefur nú verið MAÐURINN í Kópavogi í yfir 20 ár og ég held að Kópavogsbúar viti ekki hvað
þeir hafa átt fyrr en þeir missa hann Gunnar minn.

Litlausi bæjarstjórinn

Mér bregður dálítið við að heyra Dollý tala svona hlýlega til Gunnars, en veit
þó að henni hefur verið hlýtt til hans á sinn undarlega hátt.

-Litlausi bæjarstjórinn mun ekki ná árangri enda erfiðar hann ekki mikið drengurinn sá. Hann telur sjálfan sig eiga fyrsta sætið hjá íhaldinu í Kópavogi en öllum að óvörum þá fellur hann niður í þriðja sætið í prófkjörinu og í framhaldinu lætur hann sig hverfa af vettvangi. Karlmaður sem er mikið innvinklaður í íþróttastarf og hefur talsverða peninga á milli handanna mun ná fyrsta sætinu og miðaldra kona mun fylgja honum. Saman ná þau þokkalegum árangri og munu sitja í meirihluta í Kópavogi næsta kjörtímabil.

-Með hverjum? Spyr ég.

-Með hverjum, með hverjum segir þú, með hverjum? Er það ekki milljón dollara
spurningin ljúfan mín, segir Dollý og neitar að láta nokkuð uppi um það.

-Hvað með flokkinn minn? spyr ég lágum rómi.

-Flokkinn þinn! Þú átt ekkert góða mín, ekkert. Hvurslags orðbragð er þetta?

-Mig langar bara að vita hvernig Samfylkingunni mun ganga í Kópavogi, segi ég
og er einhvernvegin hvergi bangin.

-Þetta fer allt einhvernvegin, segir Dollý. Hvorki mjög vel né mjög illa.

-Hvað getur þú ekki sagt mér eitthvað fleira en það, þetta gæti hver sem er
sagt! Segi ég og er dálítið pirruð.

-Hvurslags frekja er þetta í þér stelpa, hvæsir Dollý en muldrar svo, eða á ég
kannski að segja kerling eins og Pétur gerði hér um árið. Ég sé hana brosa
bakvið tennurnar og kýs að þegja.

-Þetta fer allt einhvernvegin, en þrír flokkar af þeim fimm sem nú sitja í bæjarstjórn þurrkast út. Og Guðríður verður formaður kennaranna. Það ætti að
gleðja þig!

-Já, nei, nei, það gerir það svo sem ekki og þó, muldra ég en spyr svo. Hvað
segir þú mér af veðrinu og náttúrunni?

-Nú spyrðu réttrar spurningar, það var mikið. segir Dollý og dæsir.

Ég nældi mér í hálsbólgu og komst ekkert út í dag. En af svölunum mínum um miðjan daginn blasti þetta við. Get ekki sagt að þetta hafi verið skemmtileg heimsókn í garðinn!

-Veðrið verður heldur hagstæðara í sumar en í fyrra, en við megum ekki gleyma því Íslendingar að hér geta veður orðið válynd með næstum engum fyrirvara. Því miður munu nokkrir fara flatt á þessu og mér sýnist að einhverjir muni verða úti á árinu 2014. Það er nokkuð sem á ekki að geta gerst nú um stundir, en þegar menn fara ekki varlega og jafnvel glæfralega þá getur þetta því miður orðið niðurstaðan. Náttúran tekur bara það sem henni er fært og ef menn gæta ekki að sér geta þeir endað bæði dauðir og náttúrulausir.

Dollý dæsir, rýnir í kristalskúluna sína, tekur vænan sopa af annarri flösku sem hún dró upp undan stofuborðinu og heldur síðan áfram.

-Menn eru ennþá að hafa áhyggjur af Kötlu gömlu, en hún lætur ekkert raska ró sinni. Allra síst spádóma um slíkt. Hins vegar verða hamfarir á stað sem ekki hefur verið þekktur fyrir slíkt hingað til og menn átta sig loksins á því að
náttúran öll er ein heild. Ef eitt fer af stað þá hnikast allt til.

Íslendingar halda áfram að væla yfir veðrinu, en á meðan þeir dunda sér við það mun sólin brosa við þeim, það eina sem þeir þurfa að gera er að fara aðeins út fyrir þægindahringinn, já út fyrir bæinn og þá geta þeir notið einstakrar veðurblíðu. En við erum svo sjálfhverf að við getum ekki notið blíðunnar af því hún er ekki í bakgarðinum hjá okkur. Þessi þjóð er að verða náttúrulaus á svo marga vegu að mér stendur ógn af því.

Annars verða náttúruöflin frekar blíð við okkur á árinu 2014, það verður ekki of hlýtt og ekki of kalt, heldur eitthvað þar á milli og fólk mun fussa og sveia. Það verður enda uppselt í allar sólarlandaferðir á árinu og þó flugfélögunum fjölgi þá mun verðið ekki lækka, heldur hækka, enda er fólk tilbúið að greiða næstum því hvað sem er til að komast til fyrirheitna landsins, þar sem eilíf sól skín. Eins og slíkt land sé til!

Fræga fólkið í útlöndum

Enn sýpur Dollý á flöskunni, yglir sig en lítur svo blíðlega á mig með spurn í augunum.

-Hvað með fræga fólkið? Brad Pitt, George Clooney, Juliu Roberts, Angelinu
Jolie og félaga. Hvað með kvikmyndagerðarfólkið íslenska og útlenda?

Dollý skiptir um svip og hvæsir á mig.

Roberts Clooney-Hvurslags spurningaflóð er þetta eiginlega góða mín. George Clooney gengur loksins í hjónaband, með fjallmyndarlegum karlmanni og fellur í algjöra ónáð í Hollywood fyrir vikið. Hans tími er löngu liðinn og hann á sér ekki viðreisnar von. Julia Roberts mun hins vegar leika í bráðskemmtilegri mynd, sem átti að vera gríðarlega dýr en endar sem block buster ársin, fyrir sama og engan
pening.

Erlendir leikstjórar halda áfram að koma hingað til lands og gera myndir í íslenskri náttúru og við munum sjá enn fleiri fræga en nokkru sinni. Og líklega verður Kaffi París bókað langt framí tímann fyrir kvikmyndatöku.

Baltasar Kormákur heldur áfram að gera góða hluti í Hollywood og nýtur mikillar virðingar vegna þess að hann getur gert frábærar myndir fyrir lítinn pening. En Benedikt Erlingsson verður sá sem slær í gegn og mun hann fylgja eftir Hollywood endurgerð af myndinni Hross í Oss, sem mun hljóta heitið Only One Horse í henni Ameríku.

Það fjarar heldur undan tónlistarfólkinu okkar en þó mun Hjaltalín slá í gegn í Asíu og verður það ekki síst ljósa síða hárið hans Högna til þess að Asíubúar verða afskaplega mikið hugfangnir af hljómsveitinni.

Pólitíkin er allsstaðar eins

-En hvað með útlönd, pólitíkina þar?

Pólitíkin í útlöndum er ekkert öðruvísi frá pólitíkinni hér skal ég segja þér. Þar verða sviptingar og ég sé mikið ófriðarbál í Rússlandi og í Búlgaríu. Stjórnvöldum gengur illa að ráða við þar allskonar minnihlutahópa sem vaða uppi með leiðindum og dónaskap. Rússar munu hins vegar taka mjög fast á þeim sem ætla sér að raska ró þeirra sem sækja vetrar Ólympíuleikana og verða þeir gagnrýndir mjög fyrir óbilgirni og skepnuskap. Þeir munu ekki láta segjast og halda sinni ógeðfelldu stefnu. Fyrir vikið mun alþjóðlega ólympíunefndin sitja undir miklu ámæli fyrir gunguskap og munu allmargir háttsettir embættismenn innan IOC þurfa að segja af sér.

29. janúarÁ Norðurlöndunum verður líf og fjör. Í Danmörku mun eitt gríðarlega stórt hneyksli skekja þjóðina og í Svíþjóð verður farið að leita logandi ljósi að mikilli hetju til að taka við sem formaður í Demókrataflokknum. Leitin mun bera árangur og nýr framtíðarleiðtogi mun taka við. Það fylgir mikil gæfa þessari persónu og mun hún reynast okkur Íslendingum ákaflega vel.

-Hvað með íþróttirnar, sérðu eitthvað þar?

Dollý horfir á mig í smá stund, hún er hálf tóm til augnanna, lygnir þeim svo aftur og segir hægum róm.

-Auðvitað sé ég eitthvað þar. Þetta verður einstaklega dapurt íþróttaár hjá boltagreinunum hér heima. Engin stór afrek unnin í handbolta, fótbolta eða körfubolta. En einstaklingar í íþróttum munu vinna mörg afrek, sem ekki verður tekið vel eftir. Aníta mun ekki ná sér á strik í frjálsíþróttunum en það mun önnur ung stúlka gera og hún mun vekja gríðarlega mikla athygli almennings. Þá mun kraftlyftingamaður slá í gegn og verða í 2. eða 3. sæti í keppninni um sterkasta mann heims.

Þú gleðst þó yfir því að Arsenal verður meistari í Englandi.

Fjármálasnillingar finnast víða

Við vinnum líka í keppninni um Ungfrú heim og svo munum við eignast okkar fulltrúa á forsíðu Vouge. Gríðarlegt hneyksli kemur upp í kjölfar þess enda er ekkert ókeypis hér í þessum heimi.

-Hvað með fjármálasnillingana okkar, halda þeir áfram að slá í gegn?

-Fjármálasnillinga, huhhh … það eru nú meiri snillingarnir eða hitt þó heldur. En já auðvitað höldum við áfram að trúa því að við séum mest og best í fjármálum eins og áður. Núna fer mest af snilldinni fram innan veggja Kvíabryggju og þar verða haldin námskeið sem talsvert af þekktu fólki mun sækja. Já það munu í alvöru vera haldin námskeið í fjármálalæsi á Kvíabryggju hvort sem þú trúir því eða ekki. Annað eins hefur nú gerst!

Ég kinka kolli og samþykki það sem Dollý segir, enda er þetta sennilega ekki vitlausasta sýnin sem hún hefur fengið um ævina.

Hneykslismál innan dómstólanna

blint réttlæti-Það kemur upp eitthvert hneykslismál í tengslum við dómstólana hér en aldrei þessu vant munu Íslendingar vinna vel úr því máli, af skynsemi og yfirvegun þannig að eftir því verður tekið.

Davíð Oddsson lýkur loksins við að skrifa bókina góðu og mun hann þar svara Össuri Skarphéðinssyni og Steingrími Sigfússyni fullum hálsi. Þá verður hann óvenju vondur við konur – en það munu ekki vera ný tíðindi.

Sátt mun nást um nýjan landspítala en síðan mun málið koðna niður og enn verður notast við úreltar og löngu úr sér gengnar byggingar um a.m.k. einn áratug. Merkilegt að stjórnmálamenn skuli alltaf þurfa að þrasa um smáatriði en ná ekki sátt um það sem máli skiptir. En við erum smásálir – segi það enn og aftur við erum smásálir.

Íslendingar tæknilegri en fyrr

Umferðarslysum mun fækka á ný og löggjöf gagnvart ölvunar- og hraðaakstri verður hert. Það er gott enda eitt af fáum málum sem algjör samstaða mun nást um innan Alþingis.

Ríkisútvarpið mun ganga í endurnýjun lífdaga og sífellt fleiri fara að stilla inná Rás 1 til að sýna fólkinu þar samstöðu. Stjórn RUV mun sjá að menningarhlutverk útvarpsins er vanmetið og bæta í fjárveitingu til stöðvarinnar.

Íslendingar verða tæknilegri með hverjum deginum sem líður og mörg fyrirtæki á sviði hugbúnaðar munu ná nýjum hæðum á árinu. Þetta verður til þess að enn á ný mun þjóðin ofmetnast og telja sig besta í heimi, a.m.k. miðað við höfðatölu. Sumt breytist aldrei.

Hvað með mig?

Ég sé að spólan í tækinu er farin að styttast í annan endann og ætla að biðja Dollý um að hinkra aðeins en þá verður mér litið framan í hana og sé ég að augnlokin eru farin að þyngjast. Ég flýti mér því að spyrja hana síðustu spurningarinnar.

-Sérðu eitthvað af mínum högum?

-Já ég átti eftir að segja þér það að árið byrjar vel, þú gengur í gegnum mikla hreinsun og uppskerð eins og þú sáir. Þú finnur frið í sálinni og gæfan verður þér hliðholl. En farðu þér hægt mín kæra – það er auðvelt að brenna út ef þú ætlar þér of stóra hluti. Ekki taka of mikið inná þig og mundu að brosa á hverjum degi. Þú þarft að takast á við nýjar áskoranir og taka áhættu í lífinu. Það skilar árangri á endanum. Blessi þig elskan mín!

Hér slokknar hreinlega á vinkonu minni og ég geri það sem ég gert svo oft áður, ég styð hana inní rúm, slekk á kertunum og læsi á eftir mér þegar ég geng út í náttmyrkrið.

-Blessi þig Dollý mín og takk fyrir kvöldið.

 

Ertu sátt? Segðu frá Dollý á þinni síðu

Maby I should have!

Mig langar að segja þér af hverju ég ætla að kjósa Árna Pál Árnason í 1. sætið í flokksvali Samfylkingarinnar nú um helgina.

Ástæðan er ekki bísna flólkin, en þó eru tvær ástæður sem mig langar að deila með þér.

Í fyrsta lagi þá hef ég stutt Árna Pál í síðustu tveimur prófkjörum og mér finnst hann hafa staðið sig vel. Í síðustu kosningum náði hann (og aðrir á listanum) þeim frábæra árangri að verða stærsti flokkurinn í Suðvesturkjördæmi og hefur Árni Páll því verið fyrsti þingmaður kjördæmisins síðustu fjögur ár.

Í öðru lagi ætla ég að setja Árna Pál í 1. sæti vegna þeirrar lagasetningar sem hann hefur verið hvað mest gagnrýndur fyrir, Árna Páls lögin.

Ástæða þess er sú að í júlí 2007 keypti ég mér bifreið, setti annan bíl uppí og tók afganginn að láni hjá Lýsingu. Fljótlega eftir að ég fór að greiða af láninu kom í ljós að ég var alls ekki að greiða þá fjárhæð sem mér hafði verið kynnt (ríflega 25 þúsund krónur) heldur hækkaði afborgunin nær samstundis í 35 þúsund og hækkaði síðan jafnt og þétt. Það var þá fyrst sem ég gerði mér grein fyrir því að lánið sem ég hafði tekið var gengistryggt lán. Þess var aðeins getið í smáa letrinu í lánssamningnum og allar tölur voru gefnar upp í íslenskum krónum.

Ég veit vel að það er aðeins við mig sjálfa að sakast að hafa ekki lesið samninginn betur og barði ég höfðinu í vegg nokkra mánuði á eftir, þó aldrei meir en einmitt eftir október 2008 þegar lánið tók stökkbreytingum og ég greiddi að um 70 þúsund krónur á mánuði af láninu.

Árið 2010 fór ég til fyrirtækis sem heitir Sparnaður og bað þá um að reikna út lánið mitt miðað við þær forsendur sem þá var rætt um. Þeirra niðurstaða var eftirfarandi:

Lánið eins og lánafyrirtæki hefur innheimt
Höfuðstóll: 1.878.000 – lán tekið 13. júlí 2007.
Meðalgreiðslur á mánuði skv. greiðsluáætlun við lántöku: 26.000
Meðalgreiðslur á mánuði sl. 3 ár: 64.000
Heildargreiðslur sl. 3 ár: 1.757.000
Eftirstöðvar láns skv. lánayfirliti 1. júlí 2010: 3.167.000

Eftir Árna Páls lögin var Lýsingu gert að endurreikna lánið, ofgreiðsla var nýtt til að greiða niður höfuðstólinn og frá þeim tíma hef ég greitt um 25.000 krónur á mánuði. Enda fór það saman við útreikning Sparnaðar:

Miðað við dóm hæstaréttar og 3,1% meðalvexti ætti lánið að standa þannig:
Meðalgreiðslur á mánuði hefðu átt að vera: 25.000
Eftirstöðvar láns miðað við það sem greitt hefur verið: 167.000
Ofgreitt til lánafyrirtækis með vöxtum: 1.014.000
Eftirstöðvar ættu að vera: 1.182.000

Frá því lögin, sem síðar voru dæmd ólögleg af hæstarétti, voru sett hafa þau sparað mér og tugþúsundum annarra lántakenda í sömu stöðu ómældar fjárhæðir, í mínu tilfelli milli 40-50 þúsund krónur á mánuði og munar um minna.

Maby I should have

Lög Árna Páls voru umdeild, en hann hafði kjark, dug og þor til að takast á við það verkefni og hann framkvæmdi. Það er að mínu mati mark um góðan einstakling þegar menn takast á við verkefni dagsins og framkvæma.

Það er nefnilega svo miklu betra að framkvæma og sjá eftir því en að framkvæma ekki og sjá síðan eftir því og vitna ég til hinna frægu orða þáverandi forsætisráðherra „Maby I should have“.*

Ég ætla að setja Árna Pál í 1. sætið og skora á þig að gera slíkt hið sama, við þurfum alþingismann sem þorir.
Með kveðju, Ingibjörg Hinriksdóttir (Ingó/Dollý)

 

* Með þessum orðum er ég alls ekki að halda því fram að Árni Páll hafi séð eftir því að hafa sett lögin, þvert á móti held ég að hann sé nokkuð stoltur af því og það er ég líka.

 

Ertu sátt? Segðu frá Dollý á þinni síðu